Knops ta ripiti na Tweede Kamer: Sin acuerdo, Aruba no ta haya placa

DEN HAAG – Tanten no tin un acuerdo claro cu e.o Aruba, Hulanda no ta pone e ayudo di likides disponibel. Cu esaki, secretario Hulandes Raymond Knops a bolbe subraya cu sin acuerdo, Aruba no ta haya placa. Knops den un carta di 30 pagina fecha awe na Tweede Kamer, a contesta como 80 pregunta di 5 fraccion riba e pakete di ayudo cu Hulanda a ‘ofrece’. Y entre e contestanan atrobe, Knops ta subraya cu e consecion di e di tres tranche, ta sosode ‘despues cu a cumpli cu e condicionan mara na e di dos tranche, y si tin asentimento politico riba e condicionan valido pa e di tres tranche. “Pesey te cu awor, no a duna nada di sosten likides” Knops a bisa. Mes momento sinembargo, Knops ta sigura si cu si Aruba (y e otro islanan no keda cla cu e compromiso), Hulanda lo sigui duna ayudo di emergencia den forma di cuminda. “Hulanda lo no laga esnan vulnerable na caya”, Knops a sigura Tweede Kamer. 

ENTIDAD

Un otro asunto cu a wordo ‘subraya’ atrobe pa Knops ta e parti di entidad. Aki tambe a bolbe splica cu Hulanda ta keda den control di e entidad, y e motibo di esaki. “E organisacion di e entidad ta wordo paga cu placa di belasting di Hulanda” Knops ta sigui bisa. “Tambe tur medio financiero cu e entidad lo por suministra, sigur den prome instante, ta wordo paga completamente pa e ciudadano Hulandes. Y ta pesey e entidad ta wordo structura den un forma Hulandes (ZBO)” Knops ta sigui contesta. E pregunta a bin a base di e preocupacion di e partidonan politico Hulandes, pa loke ta e poder cu e entidad aki tin y si e islanan di Caribe tin poco ‘poder den dje’. Knops a sigura cu e miembronan di e entidad lo wordo nombra pa e minister di BZK, pero cu e ta dispuesto pa den e ley di reino, por tin ‘consulta’ cu e islanan riba e exigencia cu lo pone pa e miembronan di e entidad. 

ISLANAN NO TIN INFUENCIA

Segun Knops, a base di articulo 18, e gobiernonan di e islanan no tin influencia riba e nombracion di e expertonan pa e entidad. Di otro banda, esey no kier men cu lo por apunta un experto di ei islanan. “Si e entidad tin su mesun expertisio, e lo usa esaki. Si e no tine, e por huur e experticio aki, y esey por ta experticio di e islanan tambe. Lesa e carta completo AKI.