Wever: Meta di Toque de Queda ta pa tene HOH liber pa pashent di COVID19

ORANJESTAD – E meta principal pa a re-introduci e Toque de Queda e siman aki, ta pa proteha e cantidad di camber pa COVID19 den hospital. Asina prome minister Evelyn Wever Croes a splica Parlamento diahuebs mainta. E mandatario a duna Parlamento un update riba e situacion di COVID19 na Aruba awe mainta. Hopi no por a compronde e logica tras di e re-introduccion di e medida y tambe e horario laat di e Toque de Queda, esta di mei anochi te mainta 5’or. Pero, segun Wever, esaki ta pa evita casonan di abuso pa alcohol, hincamento, accidente, y otro trauma cu tambe ta pone e cambernan di ICU yena den hospital na Aruba. Algo cu gobierno kier evita. Como tal, a usa e arma aki, pa netamente ‘cuida’ e cantidad di camber di HOH y tene asina practicamente solamente pa pashentnan di COVID19. 

REALIDAD

E realidad sinembargo segun e portal aki a compronde di polis, ta cu accidentenan manera kier evita, ta sosode prome cu 11’or di anochi. Por usa como ehempel e casonan di morto di trafico, tur a sosode, pafo di e ora di Toque de Queda impone. Tin na Maart ultimo 8am, e prome morto, sigui pa uno 10:44pm y e ultimo caso tabata atardi den careda di 6'or. Casonan di violacion y posibel hincamento, no ta tuma lugar entre e orarionan stipula, pues no ta sigur cu e orario impone, lo logra e meta. Pero, tempo lo mustra si enberdad e 2 simanan aki e situacion por wordo controla. Tambe tin e cuestion di overtime di polis, cu aparentemente no tin mas pa paga, pero si mester usa polis pa 'controla' violacion di e TdQ di nobo. Diahuebs mainta tin un reunion di polis pa atende e.o. e asunto aki. 

LEGAL

E aspect legal tambe ta un punto unda cu mester evalua e uso di e arma serio aki di Toque de Queda. Si ta usa TdQ como medida pa controla COVID19, e no por wordo usa pa controla orden publico. Esey ta netamente e motibo cu ora cu a cancela e medida, tabata pasobra e cantidad di casonan no por a sigui hustifica e medida su meta, esta reduci COVID19. Kier a sigui usa e medida, pero e ora pa controla orden publico. Pero esey no por wordo usa sin mas, mirando e libertad cu ta kita di e ciudadano.