Cirugano local ta denuncia DVG y kier un disculpa

ORANJESTAD – E specialista cirugano Arubiano Tim Peterson a entrega un keho contra Directie Volks Gezondheid (DVG) pa e hecho cu e lista di nomber di pashent (supuestamente positivo di COVID19) a lek recientemente, pero mas specifico cu su nomber tabata ariba siendo cu e la test negativo. Ademas e ta exigi pa publicamente DVG coregi e fayo y sigura cu loke a sosode  ta un ekibocacion y cu e mester un dispensa publico. Asina e cirugano a informa diaranson mainta. E cirugano den un documento ta repasa e loke el a pasa aden y e motivacion pa cu e denuncia haci. E denuncia ta   debi cu e informacion circulando, ta perhudica su persona professional y personalmente. 

KICO A PASA 

Segun Peterson, dia 23 di augustus ultimo, el a tuma nota den prensa di e lista di persona positivo di COVID19 cu a lek di DVG. Pa su sorpresa, su nomber ta aparece riba e lista, ademas cu informacion incorecto. “Esaki cu tur consecuencia funesto pa mi, mi pashentnan, mi personal y tercera parti”, Peterson ta sigui bisa. 

KEHO

Debi na esaki, el a entrega un keho contra DVG, pa a usa su nomber riba e lista, y e hecho cu e lista a lek. Segun Peterson, e ta viola su privacidad y su bida personal, y tambe ta viola secrecia medico. E ta mustra cu e lista nunca mester a wordo traha, sigur no sin e formato cu ta garantisa secrecia di dje. 

DAÑA REPUTACION

Peterson ta referi cu debi na su carera respeta di 25 aña largo como cirugano, e ta haya su mes obliga awor pa splica kico a pasa cu su nomber por a aparece incorectamente riba e forma illegal aki riba e lista y evita mas problema. E ta bisa di a bolbe di Hulanda dia 9 di augustus recientemente cu su famia y a haci e COVID19 test na aeropuerto. Aki el a nota caba cu esaki a bay hopi ‘rommelig’. Despues e la ricibi un email cu e resultado lo a bin y cu lo tuma contacto cu ne y cu e mester a bay den isolacion. Cu esey e la nota cu e ta positivo. Asina mes, nunca e no a ricibi un resultado mes y tampoco a wordo yama riba e asunto. Por lo menos, segun Peterson. 

OTRO PRUEBA

Debi cu e no tabata confia e test, y cu si e no tabata positivo, e por a cuminsa traha bek mesora como medico, el a laga su mes test atrobe dentro di 15 ora. E la haci esaki na Laboratorio di Servicio (Robert Wever), y despues na e laboratorio di hospital   LABHOH-Fundacion Servicio Laboratorio Medico Aruba (Bert Rodenburg). Ambos test a sali negativo. Cu esaki, a conclui cu no por ta otro cu e test na aeropuerto tabata ekiboca y cu lo a ‘switch’ di prueba. Despues el a haya un ok di director di DVG Jerry Staring pa continua cu su labornan. A kere tambe cu lo tabata corecto pa a kita su nomber di e lista en cuestion mientrastanto. Algo cu sinembargo no a sosode y cu awor a pone den un desventaha. “Mi nomber a aparece completamente ilegal pa cual e lekmento ilegal di e lista a tene consecuencia negativo pa mi reputacion. Despues di dia 11 di augustus mi a tene consulta cu mi pashent y personal y tercera partido. Nan lo por acusami di actuacion iresponsabel. E confiansa den mi como cirugano, durante hopi aña, a sufri un sla duro”. Segun Peterson, tur cu a tene contacto cu ne despues di dia 11 di augustus, ekibocadamente a preocupa despues cu mi nomber a aparece riba e lista como COVID19 positivo”. Segun Peterson, e sa cu e nunca no a trece ningun persona den peliger. Por lesa e declaracion completo AKI.