Minister kier Parlamento continua cu reunion #28 pronto

ORANJESTAD – “Den interes di continuidad di mi funcion como minister di Aruba, y den cuardo di transparencia y integridad, mi ta pidi bo pa yama e reunion # 28 di Parlamento pa su continuacion mas liher cu ta posibel”. Asina minister Marisol Lopez Tromp ta pidi presidente di Parlamento Juan ‘Ady’ Thijsen den un carta cu ta den poder di e portal aki. Tabata apenas ayera (diamars) cu e portal aki a publica e contesta di Thijsen riba un eventual continuacion di e reunion. 

CONTESTA

Thijsen a contesta claramento cu lo continua cu e reunion aki (#28) asina cu e intermediacion entre prome minister Evelyn Wever Croes y e mandatario en cuestion (Lopez Tromp) termina. Pues e contesta tabata conoci caba. Esaki no a stroba Lopez Tromp di manda e carta toch pa Thijsen. A compronde cu e mandatario kier men cu como minister e por pidi un reunion y splica e pakico den landsbelang. Ademas cu Parlamento mester supuestamente funciona independientemente. No ta conoci kico e contesta lo ta riba e carta cu e mandatario a manda dialuna pa e presidente di Parlamento.