Despues di intermediacion, Parlamento lo sigui cu reunion cu Marisol Lopez

ORANJESTAD – Despues cu e intermediacion (entre minister presidente Evelyn Wever Croes y minister Marisol Lopez Tromp) ‘keda afgerond’, Parlamento lo yama e reunion pa continua cu e di 2 tanda cu e tema 'Marisol Lopez Tromp'. Asina presidente di Parlamento Juan ‘Ady’ Thijsen a bisa e portal aki. Mientrastanto varios parlamentario (tanto di MEP como POR) a bisa cu nan kier pa e reunion continua, pero cu nan kier wak documentonan cu a keda anuncia, prome cu e reunion tuma lugar. Por lo menos POR su miembro Alan Howell a bisa esaki awe mainta. Parlamentario Hendrik Tevreden tambe kier pa e reunion continua, pa sa kico tin di e acusacionan cu e mandatario (Marisol Lopez Tromp) a los durante e reunion publico di dia 31 di juli ultimo den Parlamento, contra varios minister y tambe parlamentario. Lo tende tambe na final, si ainda lo tin un mocion di desconfiansa contra e mandatario en cuestion. 

INTERMEDIACION

E intermediacion a wordo pidi pa partido POR na final di e reunion di e anochi ey, pa despues Lopez Tromp coi su caminda bay Hulanda pa continua cu su biahe cu e tabatin caba. De hecho el a interumpi su biahe pa bin Aruba pa atende e prome tanda. Asina cu e reunion ey a termina, el a subi avion bek pa Hulanda, te cu e ta bek na Aruba. Despues di su yegada, minister president Wever Croes a bisa e portal aki cu el a keda sorprendi cu e yegada, ya cu e minister (Lopez Tromp) lo a keda di lag’e sa, ora cu e ta bek, pero esaki no a tuma lugar. Despues di algun dia di hunga ‘cak’i sconde’, e intermediacion a inicia, pero no ta conoci kico e status di esaki ta. E hecho ta cu unabez cu esaki termina, e reunion pa trata e di 2 tanda, por wordo yama. Por lo menos segun presidente Thijsen.