Defensa Hulandes lo saca e helicopter militar cu a crash, for di e laman na Aruba

ORANJESTAD – E helicopter militar tipo NH90 cu a crash den laman cerca di Aruba na juli ultimo, lo wordo saca di laman. Asina Defensa Hulandes a dicidi diamars. Despues di evalua si ta posibel pa haci esaki, a haya confirmacion y a dicidi cu ta dal bay. Otro siman e trabounan lo cuminsa. Ta trata di dos parti. E rabo y e body mes. Un compania civil specialisa y defensa Hulandes hunto lo haci e trabou. E material necesario a yega Corsou diamars via un avion ruso tipo Antonov. Un barco cu ta esun pa saca e helicopter, lo dirigi su mes na e sitio tambe. Asina cu logra saca e helicopter di laman, lo entrega ambos pida na Inspectie Veiligheid Defensie. Esaki lo sigui investiga e accidente unda cu dos tripulante Hulandes a perde nan bida.