Welcome Snack a ricibi su seyo di oro di ATA y DVG relaciona cu COVID19

(ADVERTORIAL)

ORANJESTAD – Despues di a cumpli cu e proceso manera instrui pa Oficina di Turismo di Aruba (A.T.A.) den colaboracion cu Departamento di Salud Publico (DVG), e establecimento popular Welcome Snack a logra haya su seyo maximo di salud, cu ta e seyo di oro. Pa Welcome Snack por a logra esaki, e mester a pasa den e proceso completo. 

PROCESO

E proceso tabata den dos parti. Manera ta conoci, tur compania mester a registra y finalisa e checklist sinceramente y completo cu ta basa riba e medidanan di D.V.G. prome cu dia 31 di mei 2020. E checklist a wordo revisa y si a haci esaki satisfactoriamente A.T.A. lo a  contact e compania pa pasa busca nan seyo di pre-check. Despues cu e registracion y e checklist wordo completa y verifica, Departamento di Inspeccion y Higiena ta haci un bishita na e compania pa asina conduci un inspeccion na e sitio di operacion. Na momento cu esaki termina satisfactoriamente, lo conduci na bo compania ricibiendo e seyo final, color oro, cual ta indica cu e proceso ta completa den bon forma. Tur esaki Welcome Snack a completa y awor a ricibi nan seyo di oro. 

Cu esaki, Welcome Snack ta sigui ricibi su clientenan tur dia entre 6’or di mainta te 2’or di atardi, situa den De La SalleStraat. 

Ministerio di Salubridad y socionan clave den e industria turistico ta presenta e ‘Aruba Health & Happiness Code’. E meta tras di e programa aki ta pa sigura cu protocolnan di higiena y salud ta na un nivel cu nos bishitantenan ta spera ora di bishita un destinacion turistico manera Aruba. Como parti di e preparacionnan pa cu e reapertura di nos fronteranan, Aruba mester evoluciona como destino turistico pa asina por ta miho prepara pa sigui sirbi e bishitantenan como tambe e comunidad di Aruba. Pa e motibo aki, e Aruba Health & Happiness Code a wordo crea. E protocol y medidanan inclui den e programa di Aruba Health & Happiness Code ta tene den consideracion e diferente proveedornan cu cual bishitantenan lo por tin contacto cu ne durante nan bishita. Esaki a wordo haci door di cubri tur punto di contacto den e cadena di suministro.