OM: Esun responsabel pa publica lista di DVG por haya castigo di prizon of multa

ORANJESTAD - E ciudadando cu intencionalmente publica of plama informacion secreto, perhudicando otro hende, tambe ta comete un hecho castigable. Asina Ministerio Publico a bisa diamars den un declaracion riba nan pagina di Facebook. Den e caso aki ta referi na e documento cu a leak di e pashentnan cu a haci test di COVID-19 na Aruba. 

DENUNCIA HACI 

Ministerio Publico a confirma diamars cu nan a ricibi e denuncia di director di DVG. E denuncia ta di un hecho castigable, esta, di violacion di secreto profesional y/of publicacion di secreto profesional. Manera e portal aki a bisa, esaki relaciona cu publicacion di información di pacientnan. Ta trata di un lista cu nombernan di personanan cu a test positivo pa Covid-19 na Aruba. E lista aki a wordo comparti intensivamente door di publico via social media.

CASTIGO 

Violacion di secreto profesional y/of publicacion di un secreto profesional ta un hecho castigable cu por wordo castiga cu prizon of un multa. E ciudadando cu intencionalmente publica of plama informacion secreto, perhudicando otro hende, tambe ta comete un hecho castigable. Segun OM, tur persona mester por confia cu nan información secreto cu gobierno tin di nan, ta keda secreto!