Cantidad di caso positivo nobo di COVID-19 pa Aruba ta sigui halto

ORANJESTAD – Cantidad di caso positivo nobo di COVID-19 a aumenta atrobe cu doble dialuna, compara cu diadomingo. Pero segun DVG na e portal aki, debi na e investigacion interno cu ta tumando lugar riba e lista di nomber di pashent positivo cu a lek den weekend, e proceso dialuna a tarda pa keda cla. Ta casi algo despues di 5'or dialuna atardi, e cifranan nobo actualisa e keda presenta. Dialuna DVG a raporta 60 caso nobo di COVID-19 di cual 58 ta local y 2 ta turista. Un dia prome, esaki tabata 34. E diferencia ta cu a test algo mas di 200 hende mas cu diadomingo. Pa loke ta e casonan hospitalisa, esaki segun DVG ta 23, di cual 7 ta den ICU. Mas tempran, cifranan cu e portal aki a optene di HOH tabata diferente. E cifranan ey tabata papia di 27 caso, di cual 8 tabata den ICU, 18 riba piso y uno den cuarentena. 

Na tur tin 1628 caso positivo total, di cual 1160 ta positivo, y tin 7 morto.