Homber ta contagia pa di dos biaha cu COVID-19 na Hong Kong

HONGKONG – PAAPa prome biaha a keda confirma oficialmente cu un homber a keda contagia cu COVID-19 pa di dos biaha. Ta trata di un homber di 33 aña di Hong Kong. For di un rapport di investigacion di hospital di Hong Kong, ta mustra cu e homber despues di 4 luna y mei cu e la keda contagia pa di prome biaha, a keda contagia di nobo. Esaki ta nifica cu despues di algun luna di recuperacion, un persona por recontagia. E imunidad despues di un infeccion natural, por ta di corto duracion. E material di virus di e homber for di april, a keda compara cu e material di e virus di augustus. Esun di april, tabata varia un poco di esun di augustus. E test genetico ta mustra asina cu e virus nobo ta un variante di esun anterior. “Nos discubrimento ta sugeri cu Sars COV-2 por keda cerca e persona”. Esey no kier men cu vacuna no ta necesario. E imunidad door di e vacuna, ta diferente di e imunidad cu un infeccion natural por crea. E virus a keda detecta cerca e homber ora cu e la bolbe Hong Kong for di Spaña. E no tabatin simptoma, cu ta nifica cu e siguiente infeccion por ta mas ‘suave’.