DESPA: Persona haya morto, no a muri a consecuencia di Chikunguya

ORANJESTAD – E persona cu recientemente a wordo haya morto na Paradijswijk, no a muri a consecuencia di Chikunguya, ni otro malesa contagioso. Tur indicacion ta mustra cu e persona a fayece debi na un atake di curason. Departamento di Salud Publico a informa awe cu a haci un investigacion profundo di e caso di fayecimento cu diferente medio di comunicacion a publica cu segun rumor, tabata trata di e malesa Chikungunya, y cu ta pasobra e malesa ta uno contagioso.

ACCION TUMA

Segun e departamento (DESPA), Na momento cu nan a wordo informa di e caso aki, a tuma tur medida di precaucion na e adres di e fayecido. Como medida di prevencion Gele Koorts en Muskietenbestrijding (GKMB) a pasa directamente na e cas pa controla riba criadero. Na e cas y vecindario a fumiga pa mata e sanguranan adulto. E dokter cu a constata morto a laga sa cu e condicion di salud di e fayecido tabata mustra normal y cu no tabatin ningun complicacion medico cu ta mustra cu e persona aki a fayece a base di Chikungunya of un otro malesa contagioso . Pa e motibo aki no tabata necesario pa tuma e curpa den beslag pa haci autopsia.

E MALESA MES

Malesa Chikungunya ta cay den e categoria di malesa contagioso, pasobra e malesa ta wordo transmiti pa e sangura Aedes aegypti. Sin sangura Aedes aegypti no por tin ni Chikungunya ni Dengue. Den e caso aki docternan tin e deber di raporta cualkier caso sospechoso di Chikungunya of Dengue. Malesa Chikungunya no ta conoci pa su riesgo halto te pa muri di dje. Solamente den caso extremo esaki por ta posibel, pero na e momento ey e persona mester ta den un estado di salud hopi malo caba. Dengue al contrario si ta ocasiona sangramento hemoragico, cu por causa morto si esaki no wordo trata na tempo y debidamente. Departamento di Salud Publico kier extende profundo condolencia na famia di e fayecido.