Besaril: Di 11 studiante di Aruba positivo cu COVID-19, 4 a recupera caba

DEN HAAG - Di 11 studiante di Aruba cu a test positivo pa COVID-19 recientemente despues cu nan a yega Hulanda pa inicia cu nan estudio, 4 a recupera caba y 7 ta den nan ultimo dianan di cuarentena. Asina minister plenipotenciario di Aruba na Hulanda Guilfred Besaril a bisa noticiacla.com diamars. Besaril ta agradecido cu ningun di e personanan contagia, mester a keda interna den hospital. “Esnan recuperando ta den bon estado, claro cu e sintomanan cu ta compaña e virus pero den Bon espíritu” e mandatario a sigui bisa e portal. 

CONTROL

ArubaHuis ta den contacto cu e hobennan atravez di nan mentoren y study-buddies (hobennan den Plaatselijke Opvang Commisies).”Danki na nan tambe a logra na provee e hoben den nan necesidadnan mane shopping na supermarket of bestelling di cuminda etc.”

E CIFRAS

Pa loke ta e cifanan completo, Besaril a raporta cu tabatin 37 studiante cu a bin di Aruba cu a test pa COVID, di cual 11 a resulta positivo y 25 negativo. Un test ainda ta wardando resultado. Di e grupo menciona pues, 4 a recupera caba. A laga test tur 21 hende den Arubahuis, y tur 21 test a bin bek negativo Danki Dios.