Broeder Mericano deteni na Corsou riba sospecho di horta material di hospital

WILLEMSTAD – Un broeder (verpleegkundige) di Merca cu ta na Corsou pa yuda cu e situacion di COVID-19 a keda deteni, riba sospecho di robo di material di hospital. Asina polis a confirma den un comunicado. Ta trata di un cantidad di ‘ampoya’ cu lo a keda horta for di sala di operacion di un hospital. Ayera 5’or di atardi, recherché a detene e persona D.P. (57) pa e ladronicia menciona. Durante investigacion na e sitio caminda cu e sospechoso ta hospeda, a bin haya y confisca algun di e ampoyanan cu ya a keda usa. A presenta e sospechoso dilanti un fiscal auxiliary cu a ordena su encarcelamento pendiente di mas investigacion.