Por spera aumento di hospitalisacion casonan COVID-19 otro siman na Aruba

ORANJESTAD – Departamento di Salud (DVG) ta premira cu otro siman, lo tin un subida di e cantidad di hospitalisacion di casonan di COVID19. “Nos mester ta hopi sincero cu esey” Sharline Koolman (DVG) a bisa dialuna anochi durante e briefing riba COVID-19. E grupo di persona cu COVID-19 cu ta birando malo awor, ta di e asina yama 2e kring. Esta e familiarnan di e prome grupo cu a pega cu e virus, segun Koolman a splica dialuna anochi. 

PROME Y DI DOS KRING

E prome kring, conoci como e index group, no a bira dje malo ey. “Pesey nos no a mira e cantidad den hospital tampoco. Pero locual nos ta wak awor y locual nos a spera tambe ta cu ta bin e tweede kring. Dus esun cu a pega e mama, e wela, cu si ta cay den e grupo di riesgo” Koolman a sigui bisa. 

AUMENTO DI OPNAME

Esey ta nifica cu awor e grupo aki ( e 2e kring) ta wordo hospitalisa, pasobra nan si ta haya falta di oxigeno, problema cu hala rosea, pulmon y mester haya ayudo. Tin tres den ICU, tin dos cu mester di yudansa cu halamento di rosea aunke cu e no ta na machine. Esey no ta kita afo cu e por empeora.

KEN TIN CULPA

Segun Wever, no por culpa ningun hende cu e cantidad lo aumenta pa loke ta hospitalisacion. Segun Wever, a tuma hopi medida, sigur na comienso ora cu e medidanan tabata hopi drastico. Esaki pasobra no tabata conoce e virus, y mester a prepara. E tempo ey na maart, no tabatin ningun protocol cla pa por a deal cu ne. Despues di 3 pa 4 luna, cierto medida a tuma y por escala medida si mira cu e ta bay for di man.