Intermediacion cu minister Marisol Lopez a cuminsa awe

ORANJESTAD – E ronda di intermediacion entre prome minister Evelyn Wever Croes y minister Marisol Lopez Tromp a inicia awe mainta. Asina fuentenan fidedigno a confirma pa e portal aki. Despues cu e portal aki a raporta inicialmente dialuna cu partidonan ta ‘wardando’ otro, un di nan, a dicidi di acerca otro y awe mainta e combersacionan a cuminsa. Kico e resultado lo bira, no ta conoci. 

KICO POR SPERA

Loke por spera sigur, ta di banda di premier Wever, cu e lo pidi Lopez Tromp pa clarificacion y informacion riba e loke e la presenta den Parlamento riba e parti di corupcion. Sigur ora cu a implica cu tin cierto miembronan di coalicion cu tambe lo ta meti den esaki. E prome mandatario kier sigura cu e ta bon informa riba tur esaki, y despues wak con ta sigui. E meta ta pa wak si ta bay logra crea un ambiente cu ta kita e hostilidad entre partidonan y wak si por sigui traha hunto. Ademas, despues mester yama un siguiente reunion pa duna Lopez Tromp e posibilidad pa continua cu su di dos ‘presentacion’ y wak kico ta sali afo, pero e biaha aki, sin sorpresa pa gobierno (lesa:Partnernan den coalision), ya cu e prome tanda a gara propio miembronan di coalicion fuera di base. Algo cu Wever Croes lo no kier pa sosode sigur un di dos biaha.