Richardson: St Maarten su lucha contra Hulanda ta dunando fruta

ORANJESTAD – St Maarten ta sigui bringa Hulanda riba e ‘aanwijzing’ cu Hulanda a duna e isla aña pasa riba ‘integridad’, pero ta coopera cu e ‘investigacion’ cu tin riba e loke cu Hulanda kier. Esaki a keda confirma awe pa e lider di delegacion di e isla, Lloyd Richardson, presidente di parlamento di e isla. Segun Richardson, nan a dicidi cu no ta stroba e proceso, ya cu e pais tin hopi tempo ta warda caba pa tin un gobierno. Ta papia aki di e hecho unda cu Hulanda a dicidi cu ta pone un aanwijzing pa frustra e intencion inicial di e isla pa prosegui cu nan formacion di gobierno.

“Nos a dicidi cu nos a bringa e asunto aki te na e nivelnan mas di mas halto, si e asunto aki no keda resolvi” Richardson a bisa. Inicialmente a bisa cu nan lo no kier a coopera, pero esey a cambia. “A slack e posicion ey un poco, awor cu tin un otro gobierno, mi ta kere. Pero mi ta kere cu pa parti di gobernador, nos ta sinti cu e la wordo atendi diferente cu nos a kere tambe” Richardson a sigui bisa. Algun candidato como tal a wordo ‘elimina’ y otronan a wordo ‘scohi’ pa fungi den funcion di minister pa e gobierno nobo. “Por lo menos awor nos tin un gobierno cu ta pone cu nos por funciona” Richardson a bisa.

E lider di delegacion di St Maarten ta sigura NoticiaCla.com cu no ta cu nan ta contra e ‘hulandes’, sino na e sistema y e idea con cosnan a tuma lugar entre Hulanda y St Maarten. Y al parecer segun Richardson, e ‘actitud’ cu St Maarten a tuma contra Hulanda, ta funcionando. “Nos ta na mesa, y e reunion aki (di IPKO) por ta algo conviniente awor na januari. Y bo por mira e disponibilidad di e paisnan participe cu nan ta dispuesto pa sinta y mira e posibel solucionan cu por tin pa resolve e problema cu e isla ta aden.