Region di Caribe ta vigila Aruba su casonan di COVID-19

ORANJESTAD – Region di Caribe uy otro partinan di mundo ta vigila Aruba su casonan di COVID-19, y ta adaptando nan maneho pa cu esaki. Uno cu a hala hopi atencion ta e carta cu a leak den prensa, di departamento di aviacion civil di Corsou cu ta indica cu ‘a cera frontera pa tur pais’. Pero den e carta mes, ta haci mencion di excepcionan. Esey a crea basta confusion cu a pone cu gobierno mester a clarifica esaki despues cu un splicacion. Otro islanan tambe ta adaptando nan situacion pa cu esaki. Mas leu, paisnan Europeo manera Inglatera tambe a haci esaki. Inglatera a pone cu su bishitante cu bolbe di Aruba, tin cu bay den cuarentena obligatorio ora cu nan regresa Inglatera. 

SITUACION DI ARUBA

Siman ta habri Aruba cu mas di mil caso positivo registra di COVID-19, di cual 897 ta casonan activo, y di cual 200 persona a recupera. E cantidad di persona hospitalisa ta ainda 11 di cual 2 ta den ICU di cual uno ta na mashin di hala rosea.  

GRAFICO

Un grafico cu a keda reparti den fin di siman, a causa mas consternacion, ubicando Aruba te na top di paisnan cu tin coronavirus. Aruba sinembargo mesora a contra aresta esaki. Segun minister di salud Dangui Oduber, e grafico aki no ta un refleho real. E mandatario kier men cu Aruba tin menos di 1% di caso positivo, tin menos di 1% di nan ta hospitalisa, mientras nos ta e pais cu mas test per capita den Caribe. “ Logico cu ora bo ta esun cu ta test mas, bo ta haya mas.  Paisnan cu no test hopi, no ta haya hopi caso positivo.  Nos strategia di test agresivo ta dunando resultado y no por compara cu otro paisnan”.