Delegacion hulandes lo bolbe Hulanda cu ‘waslijst’ pa nan gobierno

ORANJESTAD – Esnan cu pensa cu reunionan interparlamentario entre paisnan di Reino e siman aki no tin balor, no sa e tarea di e parlamentonan respectivo. Asina presidente di parlamento di Aruba, Marisol Lopez Tromp ta reacciona riba e pensamento cu e reunionan interparlamentario di Reino (IPKO) di e siman aki ta un ‘perdemento di tempo’ y cu ta e reunionan entre e gobiernonan ta loke realmente ta conta. “E 4 parlamentonan actual na Aruba ta hefe di e ministernan (di e respectivo paisnan)”. Ta nan ta duna recomendacion y orden na e respectivo gobiernonan. “Ora cu algo wordo treci dilanti, e mester wordo ehecuta” Lopez a bisa. De hecho e delegacion di parlamentarionan hulandes ta bayendo Hulanda bek awor cu un ‘lista’ di acuerdonan sera’ y cu e gobierno hulandes tin cu ehecuta.

Entre e puntonan cu a keda treci dilanti e siman aki, ta figura temanan manera screening pa bira minister, e responsabilidad di gobernador, y e geschillenregeling. Tur e puntonan aki lo wordo atendi y e resultado ta bay Hulanda, unda cu gobernantenan lo tin cu tene cuenta cu esaki debidamente. Fuera di e topiconan ‘popular’ aki, tin topico menos conoci den pueblo, cu ta enseñansa, deporte, salud y mas. E conferencia di reino riba salubridad e aña aki na Aruba, ta algo cu a sali for di un reunion di IPKO di aña pasa. Awor gobierno di Reino tin cu ehecuta.