Total di 11 persona hospitalisa pa COVID-19 na Aruba, 2 den ICU

ORANJESTAD – Un total di 11 persona awor ta interna na den hospital pa COVID-19 di cual 2 ta den cuido intensivo (ICU). Asina prome minister Evelyn Wever Croes a confirma diasabra anochi. Mientrastanto mas tempran DVG a confirma cu un total di 75 caso nobo a keda registra na Aruba. Di otro banda, tin 30 persona a recupera. Cu e cifranan nobo aki, Aruba ta surpasa 1000 caso positivo total di COVID-19 desde cu esaki a cuminsa na maart ultimo. E cifra exacto ta 1048, mientras cu tin 851 caso activo di cual 836 ta local y 15 ta no residente. A compronde tambe cu tin avion cu varios medico di ICU na caminda pa Aruba for di Corsou, pa asisti na hospital. Esaki ta parti di e acuerdo cu tabatin cu Hulanda.