Wever: Deadline cu Hulanda ta ora ‘rosea financiero’ di Aruba caba

ORANJESTAD – Contrario na e pensamentonan di hopi, no tin un deadline cu ta vence diabierna pa Aruba entrega su propuesta na Hulanda. Asina premier Evelyn Wever Croes a coregi esnan den e cumbre digital diaranson merdia cu gremionan comercial, sindical y partidonan politico. De hecho, el a bisa cu Aruba no ta riba agenda di RMR, pasobra secretario di estado Hulandes Raymond Knops tin e mandato di RMR pa sigui negosha cu Aruba. E unico deadline pa Aruba, ta ora cu ‘e rosea’ financiero termina. E no a bisa cu exactitud con leu esey ta, pero a bisa cu no tin mucho tempo mas. Hecho ta, cu tanten cu no tin acuerdo, partidonan lo sigui papia, y mientrastanto Aruba lo no haya placa di e di tres tranche. 

CAMBIO

Mes momento Wever a confirma diaranson cu ‘hopi espacio  pa cambio no tin’. Esaki pasobra Hulanda ta mantene nan posicion y a simplemente cambia cierto formulacion di palabra y alarga cierto puntonan. Pero cambionan fundamental si no a logra, manera cu ya e portal aki a raporta. Durante presentacion di varios di e panelistanan, por a tende palabra nan clave cu ta describi e situacion y scenario di ‘negosacion’. Palabranan manera ‘voor zover mogelijk’, y poni ‘solamente den toelichting’, pues intencion pa cambia, pero nada concreto manera cu lo pone esaki den un ley. Esey ta e deseo di Aruba, pero Hulanda no ta asina leu ainda pa converti cierto palabranan den un ley. 

CUANTO PLACA MESTER

Durante e presentacion di e director di directie financien Derrick Werleman, a splica cu mientras cu Aruba ta logrando pa financia mitar di e suma cu mester, ainda falta mitar biyon. Parti di esey ta 478.4 miyon y 204.2 miyon di e sosten di likides cu Hulanda tin cu duna Aruba den e siguiente tranche. Aruba pues ta depende di e sumanan ey ainda, pa por sali di su problemanan financiero. Y pesey ta asina importante pa sali di e situacion aki y keda cla cu Hulanda pa Aruba por ricibi e placa necesario pa por sigui maneha su asuntonan. 

PASENSHI

Por a nota cu hopi di e preguntanan tabata mas bien ripiticion di pasado, unda cu kier clarificacion riba e status di negosacion, y kico a logra caba y pakico no ta cla pa cera deal. Tambe si tin chens ainda pa envolvimento di parti di gremionan pa cierto cambio necesario. Entre nan, ora cu ta trata e asunto di edad di pensioen. Algun a mustra cu Hulanda no por impone cierto reglanan y puntonan, ya cu mientras cu nan por ta funciona na Hulanda, esaki no ta funciona na Aruba. Pues no por simplemente copy paste algo di Hulanda y presente pa Aruba. Pero tabata notable cu Wever a indica claramente un biaha mas cu ‘hopi espacio pa cambio, no tin’. Diahuebs mainta Parlamento lo haya mesun presentacion di gobierno su ekipo, unda cu aki Parlamento lo por haci pregunta. Si Parlamento no ta di acuerdo cu e plan, por spera resistencia y consecuentemente un continuacion di impasse cu Hulanda. E potret ta di e ultimo cumbre cu a tuma lugar luna pasa den Renaissance Convention Center.