Shaheen Elhage a huramenta porfin como parlamentario na Corsou

Shaheen Elhage a huramenta porfin como parlamentario na Corsou

Posted on 08/12/2020 11:39 am AST | Updated on 08/12/2020 11:44 am AST

WILLEMSTAD – Awe mainta 11’or candidato pa partido politico PAR Shaheen Elhage a huramenta dilanti gobernador Lucille George Wout, pa asina porfin e asumi su rol como parlamentario nobo di Corsou, den representacion di su partido. Segun Elhage, e ta bay enfoca prome riba e situacion di COVID-19 y wak kico mas por haci pa remedia e situacion. Pa loke ta e pakete di medida y condicion cu Hulanda a pone pa Corsou, Elhage no por a duna mucho comentario debi cu e no tin tur documentonan ainda. Pero asina mes el a declara cu e no ta acepta e loke Hulanda ta haciendo cu Corsou, pa loke ta su autonomia. Elhage a sigui splica cu su area di enfoke como parlamentario, primordialmente lo ta salud publico ( e tabata boticario di profesion) y deporte (e ta un dirigente deportivo tambe na Corsou). Potret cortesia Tv Direct.

CORTE

Manera ta conoci, Elhage mester a recuri na corte pa por a keda cla cu e proceso pa e bira Parlamentario. Esaki pasobra partidonan di oposicion tabata boycotea e reunionan pa trata su credencialnan. Despues di varios reunion intenta, cu no a logra quorum, a dicidi di hiba Parlamento (y parlamentarionan) corte. Aki huez finalmente a impone un sentencia obligando por lo menos un parlamentario di oposicion pa coopera cu e reunion. Y finalmente esaki a tuma lugar ayera diamars, cu a pone cu por a aproba e credencialnan. Esaki a pone cu awe mainta porfin Elhage por a huramenta. Cu esaki, e ta yena e vacatura cu a keda despues di morto di parlamentario William 'Junior' Millerson. 

  • Powered by SETAR