Besaril: Ta condena con grupo di studiante di Aruba na Hulanda kier fiesta durante COVID-19

DEN HAAG – Minister plenipotenciario di Aruba na Hulanda Guilfred Besaril tabata hopi indigna diaranson mainta durante un conferencia di prensa, anunciando cu tin un grupo di studiante cu tin pensa pa haci un fiesta, estilo ‘get to gether’ prome cu scol cuminsa. E no tabata nada contento cu e idea, y a informa cu si logra haya mas informacion y gara e grupo aki, e mes lo haci denuncia na autoridad Hulandes contra esaki.

INACEPTABEL

“Esaki ta inaceptabel” Besaril a sigui bisa. “Nos no a siña?” el a sigui puntra. E ta mustra cu ta incomprendibel cu tin studiantenan cu kier hinca den nan cabez, pa haci algo semehante, den pleno crisis di COVID-19.  A recorda e studiantenan aki cu Hulanda no ta haci wega cu esaki y cu aya, ora cu nan garabo asina, ta multa di miles di euro ta wordo cobra di e studiantenan. A haci un apelacion na mayornan cu tin studiantenan cu awor a cuminsa nan estudio, pa papia cu nan y hinca poco tino den nan cabez. Segun Besaril, aparentemente e get-together ta pa celebra cu pa basta rato nan lo no topa otro mas unabez cu nan estudio inicia.