Hulanda kier Aruba duna RST y Landsrecherche autoridad independiente pa actua

ORANJESTAD – Hulanda kier control total (bek) den e parti di husticia na Aruba, concretamente, ora cu ta trata di departamentonan manera RST (Recherche Samenwerkings Team), Landsrecherche cu e meta pa nan mes independientemente por haci investigacion criminal, sin tin cu pasa via Cuerpo Policial di Aruba. E ta un di e condicionan cu Hulanda a pone pa Aruba como parti pa haya e di tres tranche di fiansa. Den pasado RST tabata traha di un forma di cooperacion, pero Aruba a dicidi e aña aki cu no ta necesario mas pa tin RST den e constelacion ey. 

EXIGENCIA DI HULANDA

Hulanda awor, pues lo kier cambio den esaki y cu e situacion di Aruba (lomba contra muraya), a opta pa condiciona e proximo fiansa hasta den e parti di husticia, exigiendo pa Hulanda haya cierto poder bek, y por actua independientemente for di Cuerpo Policial di Aruba. Cu esaki, ta mustra cu Hulanda no tin confiansa den e departamento hudicial di nos isla. E portal aki a compronde cu mescos cu varios otro punto di e plan di Hulanda, Aruba no a logra convence Hulanda pa cambia e parti aki. 

ROCCO TJON

Lider di fraccion di partido MEP Rocco Tjon, siendo un polis di profesion, tabatin interes particular den e aspecto aki di e plan ey y diaranson durante conferencia di prensa di e partido, a cuestiona e intencion di Hulanda pa mete den nos sistema hudicial, door di exigi di Aruba pa cambia e structura di tal forma cu e ta laga KPA completamente afor. Tjon a bisa cu e lo protesta contra esaki, y kier pa tende minister di husticia Andin Bikker riba e tema aki tambe.