Ta na gobierno si ta traha un ‘cas di Gobernador’ nobo of no

ORANJESTAD – Ta na gobierno di Aruba pa dicidi si ta traha un cas nobo pa gobernador y no na gobernador. Esaki pasobra gobierno ta esun cu tin cu paga pa e cas aki, y no gabinete di Gobernador financia for di presupuesto di Hulanda. Mes momento, e hecho cu nada no a pasa mas, no ta na Gobernador segun NoticiaCla.com a compronde for di gabinete di Gobernador awe merdia, manera un matutino a mustra awe mainta. Tampoco ta asina cu e gabinete ta ‘yuda’ cu e gastonan di e construccion di un cas nobo di gobernador. Esaki a keda claramente presenta durante e presentacion na 2011 di plannan pa un residencia nobo di gobernador, door di conseheronan di minister e tempo ey.  

CAS NOBO

NoticiaCla.com a compronde cu for di e tempo ey (2011), no a papia mas riba e residencia nobo, -cu mirando e situacion financiero di e pais- , a wordo considera como algo hopi comprendibel y inteligente. “Pero e decision si ta traha e residencia of no, ta keda uno solamente di gobierno”. Segun e posicion huridico di gobernador ta stipula, ta pais Aruba ta esun cu ta ofrece un ‘Cas di Gobernador’, y no Reino Hulandes. Ora cu sr Fredis Refunjol a asumi su funcion di Gobernador na 2004, e cas di Gobernador e tempo ey tabata den un estado cu mester a pasa den un reconstruccion completo, prome cu Gobernador y famia lo por a drenta aden. E tempo ey tabatin plannan traha pa esaki tambe. Pero debi na e gastonan monta na dje, nunca esaki a wordo ehecuta. Esey ta nifica cu e edificio e tempo ey caba tabata inadecuado pa wordo uza como residencia di Gobernador. De hecho, no tabata apto pa ta habita. Como tal Gobernador Refunjol a keda biba den su mesun cas na Savaneta y ta haciendo esey te dia di awe. Informacion cu NoticiaCla.com tin, ta mustra cu for di 2004, gobierno (cu ta doño di e edificio) no a haci mantencion mas ni inverti den dje. Pues, mientras cu Gobernador tin e derecho pa tin un ‘cas di gobernador’, nunca gobierno no a ofrece uno apropia y habitable..

PLAN PA RENOBA

Mas investigacion ta mustra cu na 2013, riba proposicion di gabinete di Gobernador, -cu ta maneha e edificio-, a traha un plan pa renoba e edificio y uza esaki pa finnan ‘representativo’ pa tanto Gobernador como miembronan di conseho di minister. Pa esaki tabatin dos motibo. Pa di prome, e lo a permiti gobernador (pero tambe prome minister) di por efectua su tareanan representativo di un manera mas miho. Pa di dos, no ta un bunita bista pa laga e edificio den un condicion deplorabel riba un posicion prominente, pues un cambio lo aporta na e bunitesa di Oranjestad. E gastonan di e edificio aki, lo tabata tanto pa cuenta di gobierno di Aruba como gabinete di Gobernador. Specificamente gabinete lo a tuma e parti interno y representativo pa su parti.

FUTURO

Cu e ‘reconstruccion’, e edificio ta perde su destinacion como cas, y nunca mas un gobernador lo por biba eyden. E maneho ta keda pa gabinete di gobernador y lo fungi primordialmente pa e ehecucion di tareanan representativo di gobernador, pero tambe si mester, pa minister presidente pa motibonan di recepcion. Pues manera cu NoticiaCla.com a compronde, e pregunta si cualkier dia, gobernador por haya un ‘cas di gobernador’, ta un pregunta cu ta solamente gobierno por contesta. E ta un discusion cu gabinete di Gobernador lo sigui cu hopi atencion, pero no por tuma parti na dje, pasobra e no lo aporta un contribucion financiero na dje. E potret principal ta con e cas 'bieuw' di Gobernador a keda, y esun otro ta con e tabata ora cu sr Refunjol a keda apunta como Gobernador na 2004.