Aruba a yega total di 600 caso activo positivo di COVID-19

ORANJESTAD – Diamars merdia Aruba su conteo total di casonan positivo activo di COVID-19 a yega 600, cu 87 caso riba un solo dia registra. E cifra a cuminsa subi atrobe despues cu den fin di siman esaki a conoce un caida. Di 54, a aumenta pa 67 y awe 87. Pues ainda, contrario na loke ta purbando di mustra, no por papia di ‘flatten the curve’. For di DVG, a compronde cu no a caba compila tur dato, manera e.o. e cantidad di test cu a wordo haci. Tampoco no ta conoci mas cuanto hende ta den cuarentena. E tabata un cifra cu tabata wordo duna diariamente, pero desde un periodo, a stop di wordo duna. For di tempo cu a cuminsa registra e casonan na Aruba na maart, e total completo positivo ta 717, di cual 690 tabata residente y 27 no residente. For di tur, un total di 114 persona a recupera caba, di cual 103 ta residente y 11 ta no residente. Actualmente tin 16 turista (no residente) cu ta activo.