Encuesta: Aruba ainda no ta cla pa MEP y AVP traha hunto

ORANJESTAD – Segun un encuesta di noticiacla riba Facebook recientemente, mayoria di e 2000 personanan cu a participa, no ta kere cu Aruba ta cla pa e partidonan MEP y AVP traha hunto. Un total di 76% di esnan cu a participa a contesta No. E grupo cu a vota cu nan si ta kere Aruba ta cla, tabata 24%. Mester bisa cu e mesun dia despues di e encuesta, prome minister Evelyn Wever Croes a haci un declaracion como lider di partido y personalmente, cu tanten cu e ta na cabez di MEP, lo no traha hunto cu AVP y a bay asina leu di categorisa AVP como e universidad di corupcion. 

GENERACION NOBO VS BIEU

E problema aparentemente ta den e generacion nobo y bieu politico di Aruba. E generacion ‘bieu’, no kier tende di e union entre e dos partidonan, debi na e historia amargo cu nan ta recorda di otro. Asina mes, ex lider di partido geel Nelson Oduber recientemente a admiti cu aunke e tin su reservanan, partidonan AVP y MEP lo mester pone diferencia un banda y traha hunto pa bienestar di Aruba. Sinembargo e resto di generacion di pasado, no kier tende mes di esaki. E generacion nobo sinembargo, ta mustra di ta cla pa un cambio y ta cla pa pone man na obra pa e dos grandinan traha hunto. E ta un deseo di Hulanda tambe pa esaki sosode, pero ainda no a yega asina leu.