Wever: No ta sinti ainda cu a logra consesion grandi cu Hulanda

ORANJESTAD – Mientras cu Aruba a logra varios consesion di Hulanda riba nan propuesta, premier Wever Croes no ta sinti cu a logra consecionan hopi grandi, pero si hopi aclariacion. Asina e prome mandatario a bisa noticiacla.com dialuna anochi riba e tema di negosacion cu Hulanda pa e proximo tranche di placa. No ta conoci si e consecionan duna,  ta suficiente pa Aruba acepta e propuesta di Hulanda. Si Aruba no keda cla pa diabierna, partidonan lo sigui negosha te ora cu keda cla. Pero, mientrastanto, Aruba no ta haya placa di Hulanda. 

PROCESO

Segun Wever, mientras cu no ta logrando mucho tereno, e ta suficiente si pa continua riba dje. Ta finalisando locual cu Aruba por logra den negosacion, y e siguiente paso ta consulta cu gremionan y Parlamento, pa despues presenta e plan final na RMR diabierna. Si no keda cla pa duna Hulanda contesta diabierna, lo tin mas tempo ainda. “Por ta algun dia mas, cu nos por caba di fine tune e diferente propuestanan” Wever a contesta e portal aki. 

DIFERENTE CU CORSOU

Segun Wever, no por compara Aruba su situacion cu esun di Corsou y St Maarten, pasobra e dos ultimonan no a acepta e propuesta di Hulanda y no a negosha. Aruba si. Aruba tin un luna ta negoshando cu Hulanda, y ta yegando na otro, aunke no manera cu e mester ta. Corsou ta presenta su plan awe tardi na comunidad durante un presentacion televisa di dos ora. Aruba no ta asina leu ainda. 

PRESENTACION

Prome cu pueblo haya e presentacion ‘final’, mester tin e consulta cu e respectivo gremionan (e siman aki ainda) y tambe Parlamento. Despues cu esaki ta cla, e ora por duna Hulanda e contesta final. Y esaki tin cu tuma lugar prome cu diabierna ainda. 

PLACA

Mientras cu tur esaki ta tuma lugar, Hulanda no por duna Aruba e placa, pasobra ‘no tin deal’. Asina cu Aruba bay di acuerdo cu e deal, lo firma esaki y Aruba ta haya e placa. E deal cu Aruba mester acepta, ta e inclusion den e entidad nobo, y tambe supervision financiero basa riba ley di Reino. Hulanda, no tin pura, pero no ta bay sinta warda un eternidad tampoco. Diabierna lo tende, kico e situacion ta bira pa Aruba.