Huez na Corsou ta obliga parlamentario Moses yuda forma quorum pa reunion

WILLEMSTAD – Huez na Corsou diamars mainta a ordena parlamentario Marylin Moses pa coopera den e proximo reunion publico pa trata e geloofsbrieven di Shaheen Elhage pa e por bira parlamentario. Awe mainta 11’or Parlamento lo a haci un di 4 intento pa logra haya quorum pa por tene e reunion. Cu e sentencia aki, Moses ta obliga di presenta pa e reunion por tuma lugar, y asina Parlamento por trata (porfin) e documentonan di Elhage pa finalmente e por huramenta. 

CASO

Despues cu na algun intento no a logra haya quorum, Elhage a entama un caso sumario cu a tuma lugar siman pasa diabierna pa ainda forza parlamento haya quorum pa trata su documentonan. E intencion tabata pa dialuna (ayera) huez duna veredicto, pero a warda te diaranson (mayan) ya cu e parlamentario Moses lo a ‘duna palabra’ di coopera cu e reunion. Sinembargo dialuna a resulta cu Moses lo a cambia di palabra y a bisa cu e no a duna palabra. Esey a pone cu huez a dicidi e ora awe mainta pa dicta sentencia, pa asina e reunion por continua, enbez di dicta te mayan, y bolbe tarda e proceso di e reunion. Esaki pasobra Corsou ta den  un crisis y no por warda mas. Por lesa e sentencia AKI.