Diabierna Aruba mester duna Hulanda su contra propuesta

ORANJESTAD – Diabierna awor ta D-Day pa Aruba, Corsou y St Maarten pa loke ta e situacion di fiansa pa yuda cu e crisis di COVID-19. Dia 3 di juli ultimo Hulanda y islanan menciona, no a haya otro y unda cu Aruba a logra convence Hulanda pa sigui papia durante reces. Diabierna mientrastanto Aruba mester presenta su contra propuesta na Hulanda pa rijksministerraad (RMR). Awe mainta prome minister Evelyn Wever Croes a confirma na e portal aki cu e tabata 'bezig cu Hulanda', pues su atencion completo tabata riba e tema ey, no obstante cu e ta den cuarentena propio pa COVID-19. 

PROBLEMA

Aruba tin problema cu por lo menos 4 punto cu Hulanda a presenta na dje, y tin cu wak si Aruba ta logra sali for di e ‘impasse’ aki. Entre nan tin e parti di e constelacion di e entidad nobo, e parti di aumento di edad di pensioen, e posibilidad pa e entidad cumpra accion den companianan NV di gobierno. Tin di nan cu Aruba simplemente no por a acepta, mientras cu 80% di e totalidad si Aruba no tin problema cu ne. Si Aruba no logra convence Hulanda di loke cu nan kier, e lo nifica cu Aruba no tin un acuerdo y mas pio, Aruba no ta haya placa pa e siguiente tranche cu tur su consecuencia cu esaki por tin pa nos pais. Aruba mester por lo menos 200 miyon pa e proximo tres lunanan, cu ta ekivalente na 70 miyon pa luna, di awor pa September. 

T-BILLS

Manera ta conoci, Gobierno recientemente a emiti bononan (T-bill) pa asina genera 80 miyon riba mercado local cu por ta un forma di genera placa sin intermediacion di Hulanda. Asina mes gobierno dialuna a sigura cu esaki ta un di e facilidadnan financiero cu Gobierno ta haci uso di dje aña aden y aña afor pa asina por cubri e necesidad financiero di nos Pais den cuadro y di acuerdo cu e apoderacion cu Gobierno ta haya fo'i Parlamento di Aruba den Presupuesto di Pais Aruba. “ E uso di T-bills cada 3 luna no ta nada nobo y sigur no tin nada di haber cu cumpramento di tempo den e negosacion cu Hulanda manera algun hende kier sugeri”.

CORSOU

Pa loke ta e otro islanan, Corsou mientrastanto ta presenta nan oferta pa Hulanda diamars atardi na television. No ta conoci si Aruba tambe lo por logra mescos e siman aki ainda. 

AVP

Partido AVP mientrastanto a pidi Parlamento pa prome minister Evelyn Wever Croes duna cuenta di kico e contra oferta lo ta. E fraccion kier pa esaki tuma lugar e siman aki prome cu diabierna ainda, y si mester, di forma digital mirando cu Wever ta den un cuarentena propio relaciona cu COVID19.