Arubahuis ta confirma e prome caso positivo di studiante nobo cu COVID-19

DEN HAAG - Arubahuis ta confirma e prome caso positivo di studiante nobo cu COVID-19. Asina minister plenipotenciario di Aruba na Hulanda a confirma pa e portal aki awe mainta. “ Nos tin mientras tanto 9 studiante cu a haci test y nos ta pendiente di e demas resultadonan. Arubahuis ta den contacto cu Gobierno di Aruba y cu GGD na Hulanda pa ricibi e instruccionnan necesario di con mester sigui atende cu e situacion. Arubahuis ta facilitando GGD cu tur e informacion necesario y GGD y Arubahuis lo tuma contacto lo mas pronto posibel cu e studiantenan den cuestion”.

“Nos lo informa lo mas pronto posibel den caso cu tur studiante nobo for di Aruba mester haci e test a base di e prome caso positivo y/of si mester bai den quarantaine obligatorio”.

Pa awo e ta consehabel pa tur studiante sigui monitor nan salud di cerca y pa meld cualkier simptoma cu ta cuadra cu simptomanan di Covid-19. Tambe ta importante pa evita lugarnan publico y pa sigui aplica tur e reglanan di hygiena y distanciamento social” . Awe tardi 4:30 (10:30 Aruba) GevMin ta duna un rueda di prensa pa elabora poco mas amplio riba e ultimo desaroyonan.