Tareanan pa director nobo di KIA delinea y cla pa ehecuta

ORANJESTAD – E tareanan pa e director nobo di KIA, -esta sra Trudy Hassell -,   ta delinea y lo mester keda implementa asina cu e bolbe for di su prome pasantia na Hulanda. Entre nan, como prioridad ta pa establece un ‘detentie programa’ pa cada prizonero cu ta caba na KIA y cu drenta e prison proximamente. Fuera di esey, e relacion cu e trahado tambe mester wordo atendi y tambe traha riba implementacion di e ultimo ley penitenciaria unabes cu e wordo ehecuta. Mientrastanto Hassell, cu tin apenas 7 dia den su funcion nobo, ta ocupa cu su ‘pasantia’ na varios prison na Hulanda.

PASANTIA NA HULANDA

Manera ta conoci, ex comisario di polis Hassell recientemente a keda selecta pa dirigi e prison na Santa di Patia, KIA. E siman aki Hassell a biaha pa Hulanda pa un periodo cortico durante cual e lo tin cu pasa na varios prison y keda informa y entrena riba e maneho di prison for di e aspecto europeo. E hecho cu Hassell a bay awor caba, enves di warda un periodo pa e traha na Aruba mes tin su motibo. Segun su hefe directo, -minister di husticia Arthur Dowers-, a opta pa esaki pa asina Hassell bay cu un mente fresco, sin cu e conoce e aspectonan di e prison na Aruba. Esey ta pone cu bo ta mucho mas receptivo pa otro facilidadnan y nan posibilidad. Si bo conoce e situacion di bo propio facilidad, bo ta bay predetermina cu un pensamento di cosnan cu ‘delanta’ bo no por of ta kere cu bo por cambia y adapta. “Si bo conoce e situacion, bo ta bisa mas liher cu cierto cosnan ‘no por’” Dowers a bisa. Como tal aworaki Hassell no conoce e situacion completamente di KIA. Esaki ta traha na su bentaha awor. Dowers ta conciente cu ora cu e bolbe, hopi cos cu e la ‘siña’ y experencia, no por wordo usa aki di e mesun forma. Dowers mes ta biaha pa Hualnda otro siman, unda cu e lo topa Hassell y bishita varios prison atrobe (e la haci esaki den pasado caba), y pone su mes na altura di kico ta kico.

TAREA PA HASSELL

Pa loke ta e tarea di Hassell, Dowers a pone como prioridad halto, pa implementa e ‘detentie programa’ pa e prizonero. E prizonero cu drenta KIA, segun e mandatario, mester sa kico ta sper ‘e, y no ta bin pa ‘pasa malo’. Berdad cu e ta cumpli cu un castigo, y unabes deteni y sera, mester cumpli cu e reglanan di ‘cas’. Pero mester bira asina cu e preso mester sa kico e kier siña asina tambe purba drecha e eror cu e la comete den su bida. Actualmente no tin e tipo di programa aki, y como tal Hassell tin cu bay traha riba esey.

TRAHADONAN

Un otro punto importante ta e forma con ta trata cu e trahadonan di KIA mes. E relacion mester ta uno di tal forma cu ambos sa kico uno ta spera di e otro. Cu esaki na bista, Dowers ta spera cu pronto por implementa e cambionan di e ley penitenciario, cu ta duna autoridad mucho mas instrumento pa sigura cu KIA ta un lugar ainda mas safe. Entre e beneficionan pa implementa e cambio aki, ta cu e ora por cuminsa listra e personal tambe. Awe esey no por, ya cu por listra solamente bishitantenan cu drenta, pero no personal, manera cu mester. Tambe mester traha mas riba e derecho di e detenido. Tin regla y tin derecho pero esey ta bay abase awor di e regla cu tin na ‘cas’, esta esun di KIA. Unabes cu aplica e ley nobo, e ta bira algo ancra pa ley cu no por scapa di dje mas. Motibo cu e ley aki no a pasa ainda ta pasobra tabatin varios punto cu mester a adapta ora cu a pasa esaki inicialmente 8 aña pasa. E ley ta na Raad van Advies awor y ta spera pa pronto esaki cambia.