Gezaghebber Rijna: No por biaha liber mas entre Aruba y Boneiru

KRALENDIJK – Boneiru ta suspende for di 6 di augusus 2020 e ‘air-bubble’ cu Aruba. E espacio aereo ta keda habri, pero pasaheronan no por biaha liber mas di Aruba bini Boneiru. A tuma e desishon aki despues cu e cantidad di persona contagia cu COVID-19 a subi drastico na Aruba. Pa motibo di e tantisimo casonan nobo di COVID-19 ta mira Aruba como un pais di riesgo halto. Manera indica den e ordenansa di emergensia tur hende cu ta bini awor for di un pais cu riesgo halto, manera Aruba, mester bai 14 dia den cuarentena na cas. Cu a suspendé e ‘air-bubble’ ta nifica cu a wanta e palabrashon tocante coneccion cu Aruba. Na momento cu e situacion na Aruba normalisa por sigui cu e palabracion cu ya ta riba mesa. 

TURISTA NA ARUBA

Tur cu tabata na Aruba despues di 23 di juli tin cu vigila nan salud. Si tin keho por tuma contacto cu departamento di Salubridad Publico. Autoridatnan na Aruba a apunta algun caminda cu tabatin contaminacion. Ta trata di e sitionan Gusto Night Club, Lola/Craft Bar and Restaurant and Nightclub i Muscles and Lungs Gym. Si tin hende na Boneiru cu durante nan estadia na Aruba tabata den un di e luganan aki entre 23 di juli 3 di augustus 2020, nan ta obliga na meld na departamento di Salubridad Publico. Por yama number di telefon 0800-0800. 

REPATRIASHON

Residentenan di Boneiru cu ta na Aruba ainda, por regresa Boneiru cu un carta di dispensacion di gezaghebber. Na momento cu tin bista riba cuanto persona tin cu repatria lo dicidi con trece nan Boneiru bek. Na momento cu a habri espacio aereo a bisa cu  biahamento ta tuma luga riba propio riesgo. Lo no bini sosten financiero pa esnan cu aworakí no por regresa. Residentenan di Aruba cu ta na Boneiru ta responsabel pa regla nan mes regreso pa Aruba.    

COREDOR MEDICO

Pa esnan ku ta na Aruba of tin cu bai ainda pa motibo medico lo habri un coredor. Ta trata aki tantu pashent di ZVK for di Boneiru i specialista medico. Lo transporta e personanan aki entre airopuerto i hospital. E chens pa contaminashon ta hopi chikitu e ora ey. Ta pidi pashentnan di ZVK pa tuma contacto cu ZVK pa haña informashon tocante nan biahe.      

KONDISHON DI BIAHE

Ta conseha tur Rubiano cu kier bini Boneiru y tur Boneriano cu kier bay Aruba pa pospone nan biahe. Pasaheronan cu pa un motibo òf otro toch tin cu bini Boneiru, ta obliga pa yena e declaracion di salud i tin cu bay 14 dia den cuarentena manera tin para den e ordenansa di emergencia. Cu e formulario departamento di Salubridad Publico ta haña informacion tocante salud di esnan cu ta bini Boneiru. Por haña e formulario na: https://bonairepublichealth.org/nl/form