Rij largo di ciudadanonan cu ta test pa COVID-19 diaranson

ORANJESTAD – Despues cu a bira conoci cu tin un brote atrobe na Aruba di COVID-19, un cantidad grandi di persona a cuminsa test diaranson. Si antes por a test solamente na hospital su laboratorio, of esnan special pa esey, awor ta laga laboratorionan priva tambe haci esaki. Entre nan, tabatin esun di Urgent Care na Noord. Rij masha largo tabatin pa e servicio di drive thru. Y tin indicacion cu esnan cu a bay test, ta pasobra nan tin chens cu nan por ta infecta. Y notable tabata e hecho cu den hopi auto tabatin mas cu un persona aden, indicando cu ta mas cu un persona lo a test. E cantidad di casonan positivo como tal, por aumenta mas ainda unabez cu e testnan aki ta cla. Ta spera cu den curso di diahuebs, Aruba por yega un cifra cu lo por te hasta surpasa e prome ‘ola, cu tabata 101. E bon di e rijnan largo, ta cu por interpreta esaki cu a duna oido na yamada di autoridad pa test y asina evita cu ta cana rond cu e virus sin sa, y ta plama esaki causando aun mas problema. Te cu diaranson atardi, e cantidad di caso positivo tabata 56, cu ta un aumento drastico di 39 compara cu un dia anterior.