Enbes di traha prison nobo, lo upgrade edificio actual di KIA

ORANJESTAD – Enves di traha un prison completamente nobo, gobierno a opta pa traha un pida acerca di e edificio existente. Lo benta un pida abou di e parti (nan) cu no ta funciona mas, y crea un facilidad nobo acerca. Segun e minister di husticia encarga cu KIA, Arthur Dowers a splica NoticiaCla.com, prome cu fin di e aña aki e trabounan mester cuminsa. Cu e parti ‘nobo’ aki, KIA lo conoce un ‘upgrade’ grandi pa loke ta calidad, servicio y seguridad di e facilidad.

CAMBIO

Un di e cambionan cu lo por nota, ta e cantidad di prizonero den un cel. Aworaki esaki ta poni na 3 prizonero den un cel. Ora cu keda cla cu e facilidad nobo, lo por cambia esaki y pone 2 prizonero den un cel. “Esei ta nifica un aumento den cantidad di cel, cu e bijbouw”. No por a bisa cuanto esaki lo costa, ni ki tempo ta kere cu esaki lo keda cla. Pero e plannan ta den proceso di keda cla pa por, por lo menos cuminsa cu e trabounan e aña aki.

CUMPLI CU CPT

Cu e trabounan aki, KIA lo por yega mas ‘serca’ di cumpli cu e reglanan europeo di e comision pa prevencion di tortura y tratamento inhumano y degradante of castigo (CPT) (lesa aki kico ta e condicionnan di CPT). E mandatario a confirma cu actualmente Aruba su prison mas grandi, KIA, no ta cumpliendo cu e reglanan internacional. Ora cu a puntra e mandatario con ‘off’ nos ta di e reglanan aki, e mandatario a bisa ‘Nos ta hopi off’. De hecho e ta mustra cu nunca Aruba no a cumpli cu esaki. Pero esaki no ta completamente falta di Aruba, sino ta mara na cierto aspecto di cual algun ta debi na nos cultura.E mandatario ta na altura cu ta logico cu na Aruba nos no por duna e mesun servicio cu tin internacionalmente. Pero loke e mandatario a mustra tambe ta cu ‘nos condicion no por stroba bo di esey’, esta di purba mehora e situacion na e prison. Aruba ta guia su mes segun normanan europeo di CPT, y aki tin cu mira kico e punto di salida ta.