Companianan na Aruba a cuminsa exigi clientenan bisti mondkapje

ORANJESTAD – Companianan, negoshinan a cuminsa exigi pa clientenan bisti mondkapje ora cu nan drenta e respectivo negoshinan. Varios banconan a pone aviso for di diamars, biblioteca y mucho mas establecimento a adapta e regla aki, y a hacie obligatorio. Tin hotelnan cu for di siman pasa a cuminsa impone regla pa nan turistanan huesped bisti mondkapje ora cu nan ta trafica den hotel. Solamente ora cu ta den piscina y sinta den restaurant, no mester bisti mondkapje. E cambio a bin mas bisto e siman aki ora cu a bira conoci cu diripiente Aruba a conoce un aumento drastico di casonan positivo, y mas pio, casonan local. Manera ta conoci, den cuestion di dos dia, Aruba a conoce 10 caso positivo local, y esaki ta premira di aumenta den e dianan nos dilanti.

HOTEL

Pa loke ta hotelnan, algun ya a implementa e regla aki algun dia atras. For di e gerente di Renaissance Hotels na Aruba Paul Gielen, e portal aki a confirma cu for di ayera tur guest di e hotel a haya un memo den nan camber, cu e instruccion pa bisti mondkapjes ora ta na lugarnan publico den hotel. Solamente ora cu bo ta den pool, of sinta un caminda, no mester bisti e mondkapje. Pero, mientras cu a pone e memo pa e turistanan for di ayera, for di comienso caba, tur trahado na e hotel ta bistiendo nan mondkapje, y ta cumpliendo cu tur regla di COVID-19.