Aruba tin 5 caso positivo di COVID-19 di transmision local!

ORANJESTAD – Aruba a conoce 5 caso positivo di COVID-19 cu ta transmission local. Esaki a keda anuncia dialuna anochi durante e briefing di COVID-19. Segun prome minister Evelyn Wever, esaki ta consecuencia di mal comportacion di comunidad dos siman pasa. A cuminsa cu e contact tracing, ya cu no ta conoci unda e personanan aki a keda contagia. E prome dosnan a keda registra merdia y e otro tresnan atardi. Cu esaki, gobierno di Aruba y e crisis team a dicidi di implementa 7 regla, cu ta drenta na vigor entrante diamars. 

E REGLANAN IMPLEMENTA

E prome regla ta cu ta ‘urgi’ tur hende pa bisti mondkapje (tapaboca) den tur caminda cu bo no por tene distancia di 1.5 meter. Esaki p.e. na supermercado, na oficina, tienda. “Si bo no por tene distancia di esnan cu ta bin cerca di bo, nos ta urgibo pa bo usa e mondkapjes eynan” Wever a bisa. E no ta obligatorio ainda, pues no tin sanccion ainda. Si aumenta e regla e ora si esaki por bira obligatorio. 

E di dos regla ta deporte. Ta para inmediatamente tur deporte  di contacto ‘indoor’ di ekipo. Tambe ta para tur deporte di contacto paden of pafo. Gym por sigui funciona segun e protocolnan anuncia. E di tres regla ta restaurant y nightclub. Pa restaurant ta bin un regla di limitacion unda cada mesa por tin maximo di 4 stul pa cuater persona na mesa. Esaki no ta conta si pa mucha. E mesanan mester ta 1.5 meter leu di otro. Den restaurant y nightclub no por tin baliamento, no por tin ‘muziekvertoning’, no por tin paramento na bar tampoco. E parti di e toonbank na e bar mester ta cera. E lugarnan aki por keda habri solamente pa sirbi hende na mesa. 

Regla 5 ta casino unda cu mester bay estrictamente riba e protocol ya determina. E regla #6 ta un di esnan mas ‘fastioso’ cu ta e samenscholings verbod pa tin aglomeracion den lugarnan publico pa maximo 4 persona. Esaki tin un excepcion pa e tipo di bruid cu ta tuma lugar den lugarnan publico manera beach. Pero ey e protocol ta aplicabel. E samenscholing no ta conta pa lugarnan manera hotel, ya cu esaki no ta wordo considera como local. E pregunta a bin debi cu tin hopi hende local cu ta kedando na hotel e simannan aki. E di 7 regla, tur lugar di trabou mester tene distancia di 1.5 meter sino mester tin shield of mondkapje. E di 8 regla ta di eventonan religioso y misa. Esakinan mester bay bek na e protocol prome. Na entiero por tin maximo di 25 hende na un momento.