Otmar Oduber a desmenti insinuacion cu e ta lidera POR for di ‘pafor’

ORANJESTAD – Durante un conferencia di prensa dialuna, despues di 7 luna di ta keto, ex lider di partido POR Otmar Oduber a dicidi di clarifica y mas bien desmenti tur acusacion cu tin den su contra, particularmente relaciona cu e presentacion recien di actual minister Marisol Lopez Tromp den Parlamento. Un pa un, pa mas di un ora, y varios biaha cu documento pa mustra esaki, Oduber tabata repasa e lista di loke e ta yama ‘mentira y insinuacionan’ cu Lopez Tromp a lansa diabierna ultimo y prome den su direccion. Dado momento e la compara su ex colega di partido cu un actor di e organisacion teatral Mascaruba, elogiando Lopez Tromp cu e un bon actor.  

GUIA PARTIDO 

Segun Oduber, el a cuminsa na desmenti cu e ta guia e partido ‘sea di banda, di patras of dilanti’, aunke cu e no ta activamente cu e partido. “Absolutamente no ta berdad” Oduber a cuminsa na bisa. E ta sigura cu no tabatin contacto cu e partido pa hopi tempo pa netamente duna espacio na e lider interino Andin Bikker pa su liderazgo (di Bikker) pa tuma lugar.  

RETIRO DI RDA Y CONSEHERO

E ta sigura tambe cu e la tuma retiro di directiva di Refineria di Aruba ora cu el a bira un sospechoso den e caso Flamingo, y ademas a sigura cu durante e periodo di tres luna cu e la fungi como miembro, cu a desconta su ‘overbruggings toelage’ di minister. Tambe e no a cobra ora cu e la asisti Bikker como consehero pa un periodo ora cu e la duna esaki. 

INVESTIGACIONMientras cu e no a toca e tema di investigacion riba su persona den e caso di Flamingo, den cual e ta un sospechoso pa su labor como minister pa cual tin varios cargo contra dje, e la sigura cu e ta dunando autoridad manera OM y Landsrecherche tur espacio pa por haci nan trabou. E ta asina sigur di su mes cu e ta splica cu ora cu a bin departamentonan cu tabata cay bou di su ministerio, el a duna ok pa e directornan respectivo duna OM e yabinan completo di kluis, pa cual nan a bay cu tur documento. E ta sigur cu for di esaki e lo sali liber tambe y tin tur confiansa den ministerio publico. Si huez na final sinembargo dicidi otro, esnan cu a haci malo, tin cu sinta riba nan blar. Y si e tambe tin cu sinta riba su blarnan, e lo haci esaki, Oduber a sigui bisa durante e conferencia di prensa. 

DOCUMENTONAN

Cu varios documento, Oduber a repasa departamento pa departamento, y a presenta su caso pa mustra asina cu e no ta loke cu ta wordo bisa di dje, y cu e no a actua incorecto, manera cu ex colega Marisol Lopez Tromp a y ta insinua durante su disertacion siman pasa diabierna. A repasa documento di proyectonan, Serlimar, DIP, contractonan di trahadonan manera Michael Carty (el a pidi permiso di Carty pa usa su nomber), unda cu lo tabatin nombracionan contra ley y illegal. A splica riba diferencia di sumanan cu a wordo menciona, versus sumanan cu lo ta esun real. 

ZWAAI CU DOCUMENTO

Segun Oduber, Lopez Tromp mester stop di zwaai cu documento den laira, y mester miho presenta prueba riba tur loke e ta y a bisa recientemente. “Mi ta kere cu ora cu bo ta bisa “A” den politica, bo mester bisa B. “Anto pa bo para un reunion cierto momento ora cu supuestamente bo mester saca documento!”