Mas di 25.000 pasahero procesa den weekend

ORANJESTAD – Aeropuerto di Aruba a procesa mas cu 25.000 pasahero den weekend, cuminsando 2015 di un forma positivo considerando e cantidad di pasahero y movecionnan di trafico aereo procesa den e prome fin di siman di 2015. Nan a yama esaki e “Super Weekend”. Mes momento ta considera e prome fin di siman despues di aña nobo historicamente ta e temporada mas ocupa pa trafico di pasahero na Aeropuerto Internacional Reina Beatrix.

E fin di siman druk a rekeri bon planificacion y coordinacion entre tur stakeholder, departamento y empleado na aeropuerto. E esfuersonan haci prome cu e fin di siman aki en particular a duna resultadonan hopi positivo, unda cu a atende en total 25.700 pasahero y 414 movecion di trafico aereo (tanto avionnan priva y comercial) den e periodo di 2 dia. E operacionnan a mantene e nivelnan mas halto di seguridad, hunto cu procesamento di pasahero eficiente y efectivo, resultando den un experiencia positivo pa e miles di personanan biahando door di nos aeropuerto.

E resultado di e fin di siman tras di lomba no lo por tabata posibel sin e esfuersonan di US Customs and Border Protection, Imigracion Local (IASA), Departamento di Border Police na aeropuerto, e unidad di K-9 di polis, Douane di Aruba, Air Navigation Services Aruba N.V. (ANSA), Aruba Tourism Authority (ATA), e aerolineanan, e ground handlernan, Departmento di Transporte Publico (DTP), e taxistanan, operadornan di concession y F&B, ASAP Services, Total Services, Valero, Universal Aviation FBO, Flexo, Aruba Security and Crime Prevention, Dienst Openbare Werken (DOW) y e ekipo di AAA entre otro.

CEO di AAA Sr. James Fazio a comenta riba e Super Weekend bisando: “Tur esaki ta danki na trabou haci den ekipo, focus y liderazgo! E ta importante pa compronde con tur parti di e operacionnan di aeropuerto ta interconecta, y cu ora tur hende ta enfoca y comprometi na nan rolnan respectivo, e resultadonan ta obvio. Door di traha hunto nos a mustra cu nos por logra hopi cos cu al final a beneficia e operacion completo na aeropuerto y e pasaheronan cu ta biaha door di nos aeropuerto”

Aunke cu na dado momento tabatin 39 avion priva y 17 avion comercial staciona riba e apron, nan a logra procesa cada un den un forma safe y lihe. “ Ni e mal tempo na e parti noreste di Merca cu a causa algun retraso acompaña pa congestion den e espacio aereo por a para e trabou eherce den ekipo”. “E tabata impresionante pa mira cada empleado bai e extra miya pa sigura e servicio adecua na nos pasaheronan y mi kier gradici cada un persona cu a haci un diferencia durante e Super Weekend! E ta impresionante kico por wordo logra cu e focus y compromiso corecto. Bon trabou tur hende!”