Wever Croes: Intermediacion cu minister Lopez no por a cuminsa ainda

ORANJESTAD – E intermediacion cu minister Marisol Lopez Tromp manera anuncia den fin di siman, awor ta resulta cu no por a cuminsa ainda. Asina premier Wever Croes a informa dialuna mainta den un comunicado. Segun e comunicado, den un carta dirigi na Presidente di Parlamento sr. Ady Thijsen diadomingo,  Wever-Croes a informa sr. Thijsen cu e esfuersonan pa intermediacion den e asunto interno di POR no por a tuma luga ainda pasobra Minister Marisol Lopez-Tromp a biaha.

Den e carta ta informa Presidente di Parlamento cu su intentonan anterior no tabata exitoso pasobra ambos partido tabata determina cu ta den Parlamento mester atende cu e topico aki.

“En bista di e seriedad di e asunto, y e peticion haci na mi persona pa intermedia, mi a tuma contact cu Minister Marisol Lopez-Tromp mesora diasabra merdia, pa confirma si e ta dispuesto pa participa na un intermediacion di mi parti, cual el’a confirma. Mi intencion tabata di haci e intermediacion aki inmediatamente pa asina e reunion por continua dialuna caba, den di dos tanda, mirando cu henter Aruba ta en espera di esaki” Wever Croes a bisa.

“Mientras mi tabata en espera pa haya sa ki ora nos por reuni, mi a tuma nota via medionan social y prensa cu Minister Marisol Lopez-Tromp tabata biahando pa Hulanda. El’a confirma esey despues y a bisa cu e ta comunicable toch mientras cu e ta na Hulanda” e mandatario a sigui bisa

EN PERSONA

Sinembargo, mirando e seriedad di e tema, Wever Croes a bisa cu e ta di opinion cu mester haci e esfuersonan di intermediacion en persona y el a urgi Minister Lopez-Tromp pa mesora cu e yega Aruba bek, pa e comunica cu mi, pa nos pone prioridad na e proposicion di POR.