Bikker: Minister Marisol Lopez a purba mancha su integridad

ORANJESTAD – Minister Andin Bikker ta lamenta cu su colega Marisol Lopez Tromp a duna un impression cu kier retire pasobra tin casonan cu mester wordo scondi. E mandatario a purba refuta tur acusacion y ponencia cu Lopez Tromp a trece den su direccion durante e disertacion den Parlamento di e mandatario di Medio Ambiente y Infrastructura. Parlamento no a logra pasa e mocion ‘ainda’ di desconfiansa y a suspende e reunion ‘te proximo aviso’ diabierna anochi. Bikker diasabra mes a convoca un conferencia pa ‘clarifica’ tur cos y ‘set the record straight’. 

MANCHA INTEGRIDAD

Bikker a opta pa reacciona riba e puntonan cu Lopez Tromp a atende riba dje so, pasobra e disertacion largo a toca varios tema y varios persona. “Den e proceso, loke mi no ta aprecia ta cu e la touch cu cierto temanan cu kier basicamente mancha mi integridad, y esey si mi ta haya hopi lamentable” Bikker a bisa. Mesora el a bay na e acusacion mas grandi cu e lo a aproba un proyecto miyonario sin bay destaho publico, como si fuera Bikker a comete algo ilegal. 

DESTAHO OF NOSegun Bikker, Lopez Tromp a tild’e di a firma un contract sin bay destaho publico, como si fuera cu esey no ta algo permisibel. “Articulo 26 di nos ley di comptabilidad ta duna bo e oportunidad pa bo por desvia di destaho publico ora cu tin casonan di urgencia” Bikker a cuminsa bisa. “Articulo 3 inciso I di e aanbestedings verordening a wordo aproba door di Parlamento aña pasa, y ta bisa hasta cu ora cu ta trata di proyectonan cu tin pa salvaguardia seguridad nacional, cu hasta e aanbestedings verordening no ta aplicabel riba nan” Bikker a sigura durante su conferencia di prensa. Ta trata di e proyecto di Guarda Nos Costa, cu segun Bikker tin un urgencia grandi. E la splica den detayes despues di tur e problemanan pa cual e mester a actua asina. Pues e ta sigura cu ningun momento el a actua ilegal. 

SPEARFISHING 

Aki tambe Bikker a splica cu cos no a bay manera cu Lopez Tromp kier pretende. Segun Lopez, Bikker ta bisa, kier a pone (esta Lopez) firma algo cu ta contra ley cu absolutamente no ta berdad. Segun Bikker, conseho di minister a bay di acuerdo cu e concepto di ‘gedogen beleid’, a wordo traha a base di concepto di Hulanda.

TRAHA HUNTOE mandatario a confirma cu Prome Minister ta den e trabou di mediacion cu Lopez Tromp, y cu e ta habri pa coopera cu esaki. Con leu e cooperacion aki por y mester bay, Bikker no tabata kier a bisa, indicando cu e no kier adelanta riba esaki y tampoco no kier specula tampoco. “Si minister president invitami pa sinta na mesa cu ne (Lopez Tromp), mi ta habri pa esey” Bikker a bisa. Pero ta keda na minister president pa dicidi kico ta pasa awor. Mientras cu un siman pasa e mandatario a bisa cu e no kier sinta na mesa mas cu Lopez Tromp, su postura diasabra tabata diferente y a bisa cu e ta ‘voor rede vatbaar’ y no ta wak niun issue pa no sinta na mesa cu Lopez Tromp. Tin mucho mas cos cu a keda papia den e conferencia. Scucha e conferencia completo AKI.