Reunion pa baha Marisol Lopez, ta suspendi te proximo aviso

ORANJESTAD – E reunion di Parlamento diabierna cu mester a bira uno historico, a caba na nada diabierna anochi. Despues cu a suspende e reunion pa algun ora diabierna atardi, partido POR a pidi pa suspende e reunion ‘te proximo aviso’. Informacion cu e portal aki tin ta mustra cu no tabatin suficiente miembro pa aproba e mocion di desconfiansa. Ademas, e informacion cu Marisol Lopez a presenta riba e asuntonan di corupcion, tabatin su efecto. Esaki ta nifica cu Marisol Lopez ta keda minister (por lo pronto), y no ta sigur kico lo pasa aworaki. 

CORUPCION

Loke ta wordo menciona tambe como motibo, ta e contenido di e disertacion di Lopez, unda cu a revela basta practica ilicito cu tabata tumando lugar den su departamento, cu conocemento di coleganan di partido POR y MEP, incluyendo minister-President sin cu a actua contra. Manera cu e portal aki a menciona, Lopez Tromp a papia di proyectonan miyonario cu colega Bikker lo a permiti pasa, sin cu esaki tabata posibel. Tambe e la bisa cu lo tin mas investigacion andando cu lo por envolve otro ministernan tambe. BAHA MARISOL OF BAHA GOBIERNO

Durante e disertacion di parlamentario Alan Howell, el a mustra na final awe mainta, cu sea Marisol Lopez ta baha, of ta baha gobierno. Esaki tabata un declaracion basta fuerte haci, cu Lopez Tromp tambe a menciona durante su di dos biaha na palabra. Mes momento el a pidi pa clarificacion riba esaki.

KICO TA PASA AWO?

No ta conoci kico ta e siguiente paso. Esaki pasobra Marisol Lopez Tromp a bin Aruba bek riba invitacion di Parlamento, mientras cu partido POR tabata todo por todo pa bahe como minister sosteni pa e demas miembronan. Algun ta pensa cu esaki ta un victoria pa Lopez Tromp y cu su decision pa bolbe Aruba tabata esun corecto. Di otro banda, algun ta pensa cu a stroba su biahe pa Hulanda, pa cual un hende of Parlamento lo mester bay responde pe. Keda pendiente pa e desaroyonan den e dianan nos dilanti. Fecha nobo pa e reunion aki no ta conoci.