Lopez Tromp: Si manda Marisol cas, e baina no ta (bay) stop

ORANJESTAD – E reunion di Parlamento diabierna, ta netamente pa atende e situacion di corupcion cu tin na Aruba. Asina minister Marisol Lopez Tromp a sigura un y tur siguiendo e reunion diabierna atardi. Lopez Tromp den su di dos disertacion, a referi na e tantismo caso di corupcion y iregularidad cu el a bin encontra den su departamentonan (DIP y Serlimar) y cu e mester a coregi. E no ta di acuerdo cu parlamentarionan cu kier yama esaki un reunion riba e desconfiansa cu riba su persona. Lider di fraccion Rocco Tjon di MEP tabata un di esnan cu a bisa cu e reunion di awe no ta trata corupcion. “E ta trata corupcion!” Lopez a insisti. Y despues e la sigui pa repasa cierto puntonan. 

CORUPCION

E mandatario a bisa cu si kere cu si core cu Marisol, cu tur cos ta stop (e la referi na baina), esey no ta e caso. “Si manda Marisol cas, e baina no ta stop!”, Lopez a bisa. “Por lo menos, mi no ta kere”, e mandatario a sigui bisa. E la referi na cosnan cu tabata pasa p.e. den DIP, unda cu hende tabata wordo tuma cu salario ‘abnormal’, cu ta e palabra cu e mandatario a usa. “Ma mishi cu un ader cu mi no ta tin cu mishi cu ne” e mandatario a sigui bisa. E ta referi na cantidad di persona cu a haya trabou, pero cu lo no ta registra corectamente, y a referi na nan como ‘spirito’. Entre nan, yen di ‘spirito’ cu ta(bata) gana salario di entre 4 pa 5 mil florin, mientras cu tin hende cu no por gana ni mil florin drechi. “Tin yen di cos cu mi topa”, Lopez Tromp a sigui bisa, indicando cu na DIP tur siman tin cosnan ta sali afo. Y segun e mandatario, no mester kere cu pasobra e ‘posiblemente’ tin cu bay, cosnan ta bay para. 

DESTAHO

E mandatario a referi tambe na casonan cu e la topa di proyectonan di 1.3 miyon florin cu no a bay destaho publico, aunke e no a bisa exactamente cua proyecto. Loke si e tabata bisa ta cu tur esaki a bay sin e forma corecto, y tabata ‘full’ contra e forma con gobierno di Aruba ta actua.

PROBLEMA DEN MINISTERRAAD

E mandatario ta haya hopi straño con un solo minister ta bisa cu e no por traha cu ne, y cu diripente esaki ta bira un problem te pa gobierno cay. “Ami no a trece problema den Ministerraad” Lopez Tromp a sigui bisa. E ta papia di solamente ‘diferencia di opinion’, pero no cu tin problema cu ta pone cu mester kita un minister. “Si ta asina, ta tur siman mester kita un minister”, Lopez Tromp a sigui bisa. 

REUNION PARA

E reunion mientrastanto a para, y ta poni pa cuminsa bek awe nochi 8:45pm. E portal aki a compronde cu a suspende e reunion pa atende un que otro. Y ora cu e reunion continua, lo cuminsa cu e di dos buelta. No ta conoci si e reunion lo termina awe ainda, pero e intencion ta pa esaki ta e caso y pa na final, parlamentarionan vota riba e mocion di desconfiansa.