Situacion laboral na waf ta sigui tenso pendiente caso sumario

ORANJESTAD – Pendiente un caso sumario dentro di proximo horanan, trahadonan di (Aruba Stevedoring Company) Astec NV a wordo conseha pa no bay den accion ‘ainda’. Nan ta e grupo di trahado cu ta baha y subi carga for di bapornan. Mediado di gobierno Anselmo Pontilius a confirma na NoticiaCla.com cu e situacion ta tenso berdad, pero e ta spera cu e caso sumario por trece claridad den e situacion laboral di e compania. E problema principal ta un ‘fayo’ den pago di bashi premie, di 1000 florin. Trahadonan a sinti falta di e suma aki den nan salario dialuna (cu normalmente ta 3000 florin pa persona), y a mustra nan malcontento mesora. Un diferencia di opinion cu e gerencia a pone cu e diferencia den e suma no a aparece riba e ‘pay slip’ di e quincena.

E trahadonan mesora a mustra cu nan ta demanda e gerencia den corte, pa medio di un caso sumario, y mientrastanto nan ta drenta accion pendiente e resultado. Pontilius ,-cu a wordo pidi pa intermedia fin di aña pasa ora cu negoshacion di CAO a peg-, ta mustra cu un accion awo no ta e miho paso. Por lo menos, no mientras cu partidonan ta den corte.

E pensamento di e gerencia ta cu como cu e CAO a vence fin di aña, e pago di e suma menciona tambe a vence. Esey a conduci na un discusion formal cu na final a resulta cu gerencia a paga un suma. E trahadonan no a gusta y a tuma e paso legal, cu ta indica cu entre awe y mayan e partidonan lo por ta dilanti mesa berde.

Pa loke ta e CAO cu a vence, Pontilius ta di pensamento cu aunke cu esaki a vence, e condicionnan laboral ta keda vigente. E resto di e contenido tambe tin problema unda cu e problema principal ta aumento di salario. Tur dos partido a presenta proposicionnan, pero no por a sali afo ainda di e parti. Tur dos parti ta di acuerdo cu mester un CAO di duracion largo (3 aña) y cu e contenido di esaki no ta cambia. Como tal, ora cu no a paga e suma completo di bashi premie, esey a bira un problema.

E conseho final ta pa trahadonan sigui traha, pendiente e caso y ta spera cu e sentencia por bin liher.