Lopez Tromp: No por impone riba dje pa tuma cierto decision

ORANJESTAD – Ningun hende ta impone decisionan riba dje. Asina minister Marisol Lopez Tromp a bisa diabierna merdia durante su prome parti di disertacion durante e reunion publico den Parlamento. E la referi entre otro na lider di partido POR cu lo tabata kier pa cierto decisionan tuma lugar, pero cu Lopez Tromp no tabata di acuerdo cu ne.

E REUNION

E reunion hopi anticipa, tabata pa trata e desconfiansa cu tin contra e mandatario. E reunion mes a cuminsa 45 minuut laat, pero unabez cu esaki a cuminsa, varios parlamentario a tene nan disertacion. Algo despues di merdia, Lopez Tromp a bin na turno pa cuminsa cu su disertacion. Segun Lopez Tromp, e la referi na lider di e partido POR cu lo a impone decisionan cu Lopez Tromp lo mester a tuma. Algo cu el a bisa cu e ta nenga categoricamente. Asina tabatin mas punto cu e mandatario a atende prome cu parlamento a pauza pa ‘lunch’.

HOPI SITUACION

E mandatario a purba repasa mas cos posibel, y a yega entre otro na e situacion na Serlimar, unda cu a confirma cu a para contracto di security di miembro di parlamento di partido POR, (Alan Howell:red) cu tabata ricibi miles di florin pa luna mientras cu no tabatin placa pa paga trahadonan. E ta admiti cu mester a haci lo corecto y awor nan (e partido) ta ‘rabia cu ne’. Ademas segun e mandatario, e compania (Serlimar) ‘ tabata failliet prome cu COVID-19’. A acusa minister colega Andin Bikker di kier impone riba su tereno y bise kico e mester haci den su cartera. Como si fuera e no tabatin suficiente trabou cu KIA, KPA y Guarda nos costa, e mandatario di husticia lo tabata bay mete ainda den cartera di Lopez, cu ta algo cu e no ta acepta. E mandatario lo continua aki rato cu su disertacion, pa despues Parlamento drenta e di dos tanda di e reunion.