Capitan di Delta na Aruba a baha turista di avion pa via di mondkapje

ORANJESTAD / DETROIT – Un turista Mericano a wordo baha di avion e siman aki ora cu e avion tabata cla pa sali bek pa Merca, for di Aruba. Tur esaki pasobra e homber no a bisti su mondkapje bon. E incidente a capta atencion di prensa Mericano e siman aki mes. Un otro turista a conta e storia riba e canal di television local na Atlanta. Ta trata di un buelo di Delta di Aruba pa Atlanta, Georgia e siman aki. 

E BUELO

E otro turista, Todd Benson cu su famia a experencia e episodio, y ta papia di un actuacion hopi bergonsoso. “E homber tabata grita ‘mi tin e bisti, mi tine bisti’ refiriendo na e mondkapje” Todd Benson a conta e periodista. Segun Benson, e stewardess tabata pidi’e pa e bisti e mondkapje bon. Despues di e odisea aki, e homber a wordo baha di e avion. Segun Benson, e homber a sigui menasa cu e ta  bay bati e stewardess. 

NO TA PROME BIAHA

No ta prome biaha cu algo asina ta sosode, desde di e crisis di COVID-19. Na Hulanda y Merca y otro caminda varios pasahero a wordo saca di avion, debi cu sea nan no kier a bisti mondkapje, of tabata bisti esaki malo. Y si nan tabata resisti (aeroliñanan a pone esaki como un regla), tabata baha e pasahero di e avion. KLM a haci esaki recientemente, tambe, pero cu un pasahero cu mester a biaha pa Aruba. No ta conoci si e pasahero en cuestion ta haya un multa pa a actua asina. Potret ta cortesia www.caribjournal.com. Wak e reportahe AKI.