Famia Tromp a celebra e entrada di Chadwick den Mayor League Baseball

PALM BEACH - Diaranzon anochi na cas di mayornan di Chadwick Tromp na Palm Beach, famia, amigo, conocirnan y compañeronan den e mundo di baseball a bini hunto pa asina mira e debut di Chadwick den liganan grandi hunto cu su ekipo San Francisco Giants. Un momento historico pero sigur emocional pa henter famia mirando cu un soño a bira realidad pa e catcher Arubano. Chadwick semper tabata un ehempel pa henter su famia, lider y un consehero. Cu hopi disciplina e la traha duro pa logra su soño awe. Aruba sin duda tabata en espera di e wega aki pa mira un otro yiu di tera debuta den MLB. E ekipo di San Francisco Giants ta gana San Diego Padres cu un walk off 7 - 6. Mester bisa cu Chadwick su bate no tabata na candela y a bay di 3 - 0. Awe un bez mas nan lo bolbe topa San Diego.

A laga traha un bunita T-shirt conmemorando e dia aki. Presente na e ocasion aki tabata tey su kerida mama Jourene Tromp, su tata Candido Tromp, su rumannan Jeandyenne Pourier-Tromp & Lyrick Pourier, Jiandido Tromp & Lizaira Tromp, Canryenne Tromp & Richmar Kelly y Jaidwick Tromp . Tambe su pareha Cherlaine Kelly y su yiu Zayn Tromp. Su welo y wela Casildo & Lydia van der Biezen, su tanta Sharine Loopstok y omo Rodney van der Biezen, su primo/a nan Sicnarf, Shaylee, Shamir Loopstok, Jeandrick y Charyanne van der Biezen.

Cortesia 297 Sports.