Secretario di estado Raymond Knops a pasa vakantie na Bonaire

KRALENDIJK - Secretario di Estado Raymond Knops (48), encarga cu relashonnan den Reino, a pasa su vakantie na Boneiru hunto cu su famia recientemente. E tabata compañá cu su esposa Laura y dos yiu hombernan Joris y Maxim. Hunto cu gezaghebber Edison Rijna, Bòi Antoin di Fundashon Historiko Boneriano (FuHiKuBo) famia Knops a cana den un pida mondi di e anterior plantashi Colombia. 

Pa famia Knops e caminata cortico aki tabata un experencia unico. Joela Kroonstadt, coordinado di e grupo di caminata Chantiwawa, cu tur diadumingo ta crusa mondinan di Boneiru, tambe a bay e caminata pa saca foto como recuerdo pa e famia, loke nan a aprecia hopi.

Tantu Raymond Kops como su esposa ta fascina pa naturalesa. Laura tin hopi saber y interes den flora, mata y palonan den naturalesa. E tabatin hopi pregunta. Asina el a conoce palonan cu tabatin importancia economico pa Boneiru den pasado, manera palunan di brasia, wayaká i watapana. Tur tres tabata produkto di exportacion.

Antoin a splika Knops (CDA) algun aspecto di historia y cultura di Boneiru, el a papia di integracion di e Hulandes Europeo den comunidad Boneriano, pa nan sa e historia y cultura, siña papia papiamento.

Dos dia despues Boi Antoin a traha sopi di juana na su cas pa secretario Knops y su famia. Di mes gezaghebber Edison Rijna tambe a come.

Probechando di e oportunidad Antoin a regala Knops dos buki interesante, tambe un memory-stick cu hopi informacion i documento di Boneiru. Un dje bukinan ta di Kuifje titulá 'E Asuntu di Florisol' cu el a traduci den pasado for di Hulandes (De Zaak Zonnebloem). Cortesia Extra Bonaire y Antiliaans Dagblad. Potretnan cortesia di Boi Antoin y Joela Kroonstadt.