Minister Lopez evaluando pa bin Aruba pa reunion di diabierna

MAASTRICHT – Minister Marisol Lopez Tromp ta evaluando pa bin Aruba pa ta presente diabierna den Parlamento. Asina el a bisa Noticiacla.com diaranson atardi. “Mi yiu ta purba convence mi pa bai” e mandatario a bisa. “ E ta haña cu mi mester tey pa defende mi mes. Ma bise cu ma bin Hulanda cu ne y p’e. E como hoben ta pensa cu si Parlamento kier bahami como Minister, cu mi mester defende mi mes y ta presente y bisa tur cos mane cu e ta” Lopez Tromp a bisa. Pero e biahe no ta sigur ainda. Riba e pregunta cu si esaki kier men cu e ta bin sigur, su contesta tabata “Bezig ta check booking possible”. 

BIAHE PA HULANDA

Manera ta conoci, diadomingo Lopez Tromp a biaha pa Hulanda cu su yiu muher cu ta cuminsa studia eynan. E portal aki a puntre diasabra ainda si e tin pensa di cancela su biahe mirando e situacion cu tin aworaki rond di su persona. Riba esey el a bisa cu e ta bay Hulanda, pasobra e tin cu hiba su yiu. Y asina el a biaha diadomingo. Mientrastanto, e siman aki presidente di Parlamento a programa un reunion publico pa diabierna awor, pa atende cu e asunto aki, esta e mocion di desconfiansa di dos parlamentario di partido POR cu lo mester wordo presenta diabierna awor cu e intencion di retira e minister en cuestion. 

REACCION PRESIDENTE DI PARLAMENTO

E portal aki a puntra e presidente di Parlamento Juan ‘Ady’Thijsen riba e asunto aki. Mas concreto, si el a yama e reunion pa diabierna pa duna e minister chens pa bolbe Aruba. Thijsen a bisa esaki: ” Vanzelfsprekend. Manera semper. Algemeen belang tin cu prevalece. Cada parlamentario y cada Minister ta consiente di su responsabilidad. Nos pais ta den crisis”. Despues a puntra Thijsen, si e reunion por tuma lugar sin presencia di Lopez Tromp, Thijsen a contesta: “Reunion por tuma lugar pero como presidente mi persona por evalua depende e motibo cu e ta duna pa no ta presente”. 

REUNION POR TUMA LUGAR SIN LOPEZ

For di huristanan cu e portal aki a busca informacion, ta sigura cu e reunion enberdad por tuma lugar sin presencia di e respectivo mandatario, manera cu e presidente di Parlamento Thijsen a bisa e portal aki mas prome. Hopi no ta considere etico, y ta haya cu mester dune un chens pa e por defende su curpa. Pero di otro forma, por compronde cu si un persona, asabiendas kico ta spere, por dicidi di no presenta, cu tur consecuencia. Pues, legalmente Lopez Tromp no mester tey pa e por wordo baha via un mocion.