Parlamento di Corsou tin chens pa haya aanwijzing

WILLEMSTAD – Parlamento di Corsou por haya un ‘instruccion’ di Hulanda (aanwijzing) of Algemeen Maatregel van Rijks Bestuur (AMvRB) si e no atende cu e aprobacion di e ‘geloofsbrieven’ di proximo parlamentario Shaheen Elhage. Asina e portal Antiliaans Dagblad ta raporta diaranson. Gobernador di Corsou Lucille George Wout lo a informa tur partido politico durante nan bishita diamars cerca e mandatario, di e posibilidad ey.

OPCION

E portal ta mustra cu sea parlamento mes ta tuma accion y ta percura pa e reunion (cu a keda cancela 2 biaha caba pa falta di quorum) diabierna awor, of por haye confronta cu e opcion di un aanwijzing. Elhage lo mester reemplasa Marylin Alacala Walle cu a entrega su posicion di parlamentario recientemente bek na partido PAR. 

QUORUM

Manera ta conoci, ya ta dos intento Parlamento di Corsou a haci pa por logra haya quorum y trata e geloofsbrieven di Elhage. Pero na ambos occasion, 5 partido di oposicion (bon pa 10 di e 21 asientonan) a opta pa no duna oido y ‘boycotea’ e reunion pa asina no trata e geloofsbrieven. Noticiacla.com a compronde cu si despues di 2 intento, Parlamento no logra haya quorum, esey ta nifica cu e persona en cuestion (den e caso aki Elhage) por bay corte pa bringa su caso. 

ELHAGE

Den e caso di Elhage, algun dia pasa el a bisa e portal aki cu e tabata evaluando cu su abogadonan pa cu e posibel caso. Mientrastanto diaranson mainta, el a bisa e portal aki cu nan ta ‘bezig ta finalisando e caso’.