Partido politico HTC kier yuda hobenan na Aruba bay dilanti

ORANJESTAD – Integrantenan di e partido politico nobo Hubentud Treciendo Cambio (HTC) a presenta nan mes oficialmente na comunidad den un conferencia di prensa diamars atardi. Lidera pa e conocido hoben Gilbert Webb(25), Jose Silva(22) y Lismara Rustveld (26), nan a bisa cu nan boga pa hubentud di Aruba no keda keto mas, lanta y duna voz. Nan mes ta hobenan cu a trece nan experiencia dilanti y cu tabata nan motivacion pa bin hunto y duna hobenan den situacion igual cu nan, un chens. Esnan cu kier bira miembro, mester ta entre 18 pa 30 aña. 

SIN TRABOU PERO CLA PA TRAHA

Segun Webb, e no tin trabou, no tin placa, pero a usa su placa di spaar pa a paga notario pa lanta e partido aki oficialmente 23 di juli ultimo. E color di partido ta preto y roz, ‘pasobra esaki ta e color cu hubentud na Aruba ta identifica nan mes cu ne. Webb ta conoci pa a lidera un booth camp algun aña pasa, cu no a termina bon y tabata den noticia den forma negativo. Segun Webb, e ta conciente di esaki pero e no a haci nada malo, no ta un sospechoso, pues no tin nada di sconde. E no ta kere cu esaki lo stroba su meta di bay dilanti como lider di un partido politico. Nan no tin un programa official politico, pero kier representa e hoben cu tin problema, y cu no por bay dilanti. 

EHEMPEL

Pa demonstra e ehempelnan di kico e partido kier logra, nan ta usa nan propio experiencia. Webb ta un tata di un yiu di 7 luna, sin trabou y sin placa. E kier percura pa otro hobenan no tin cu lucha den un situacion asina y kier pusha pa nan haya un educacion na Aruba mes, y ta dispuesto pa haci loke mester pa logra esaki. Rosveld, ta un mama hoben cu ‘a tuma e caminda robez’ pero awor kier haci miho. Mirando e problemanan cu e ta y a pasa aden door di su ‘fayo’, e kier evita pa otronan tambe haci e mesun fayo y percura pa tin un futuro pa e mamanan hoben den un situacion similar. Segun Rosveld, actualmente hobenan den un situacion asina, no tin un porvenir, y nan kier logra cambia esaki pa medio di e partido politico aki. 

PROGRAMA

Segun Webb, nan lo bin cu un systema di ITA (Inovative Technology Aruba) forma structural y fluctuation cu lo hasi cu ta elimina hopi impuesto y cargo nan pisa pa pueblo y duna un alivio na henter comunidad di Aruba, Inclui persona priva y commerciante. Plan pa pone un universidad na Aruba, cu prijs rasonabel y cu mas di 60 Facultad cu na Aruba no a ni pensa pa crece den e ramo aki ainda, tin plan pa abo como un trahador si bo perde trabou no tin nada di precupa y ta bo placa cu bo a traha pe henter bo bida. “Tin plan pa cambia henter e systema medico na Aruba sin cu mester crea gasto y hopi mas. Keda pending pueblo paso ora otro aña yega cu ta aña di eleccion, lo bo sa tur nos planes nan pa Pueblo di Aruba por tin un mihor futuro” Webb a finalisa bisando.